Коррупцияга қарши III академик Симпозиумда иштирок этилди

Тадбир БМТ ГЖБнинг Коррупцияга қарши таълим ва ёшлар имкониятларини кенгайтириш бўйича янги глобал дастури доирасида ўтказилиб, таълим орқали коррупцияни олдини олиш борасида академик ҳаракатчанликни амалга оширишни назарда тутади.

Симпозиумда 30 та давлатдан 37 нафар эксперт иштирок этди. Тадбир давомида коррупция ва гендер тенглиги масалалари, коррупцияни ўлчашда илмий ёндашувлар, коррупцияга қарши курашда замонавий технологияларни қўллаш каби долзарб мавзулар муҳокама қилинди.

Академия ходими С.Иноятуллаев тадбирда маъруза қилиб, иштирокчиларни Академиянинг коррупцияга қарши фаолияти, хусусан  коррупциянинг сабаб ва омилларини аниқлаш, унинг олдини олиш бўйича илмий асосланган таклифлар ишлаб чиқишга қаратилган илмий-тадқиқот фаолияти, шунингдек  нафақат прокуратура органлари, балки бошқа давлат органлари ходимларини ҳам коррупцияга қарши курашиш бўйича малакасини ошириш борасида олиб борилаётган таълим фаолияти билан таништирди.

Мазкур тадбир коррупцияга қарши маърифат юзасидан тажриба ва фикр алмашиш, шунингдек иштирокчиларнинг коррупцияга қарши таълимни ташкил этиш ва коррупциянинг олдини олишга қаратилган тадқиқотларни амалга ошириш борасидаги билим ва кўникмаларини мустаҳкамлашга хизмат қилди.