Кибержиноятларга қарши курашиш соҳасидаги мутахассисларнинг салоҳиятини ошириш – давр талаби

Буюк Британия ва Шимолий Ирландия Бирлашган Қироллигининг Ўзбекистон Республикасидаги элчихонаси томонидан прокуратура ва ички ишлар органлари терговчилари учун “Ахборот технологиялари соҳасидаги жиноятларни тергов қилиш масалалари” мавзусида ҳудудий ўқув курси ўтказилди.

Мазкур курс кибержиноятларни тергов қилиш бўйича оралиқ мураккабликдаги минтақавий курснинг мантиқий якунидир.

Маърузачи сифатида Буюк Британиялик халқаро эксперт, кибержиноятларни тергов қилиш соҳасида кўп йиллик тажрибага эга мутахассис Ж.Блейк жалб этилди.

Курс дастурида кибержиноятларнинг асосий турлари, тергов ҳаракатларининг тактикаси, электрон далилларни қидириб топиш ва олиб қўйиш, маълумотларни аниқлаш ва тўплаш (OSINT), ТОР-браузердан фойдаланиш, қора интернет – “Darkweb”га кириш ва бошқа шу каби долзарб масалалар ўрин олган.

Тингловчилар курс давомида олган билимларини амалий топшириқларни бажариш жараёнида мустаҳкамладилар, шунингдек муҳокама қилинаётган мавзулар юзасидан фикр алмашдилар.

Курс давомида кибержиноятларга тезкор чора кўриш ва тергов қилишнинг барча жиҳатлари, шу жумладан жиноят содир бўлган жойни режалаштириш, тайёрлаш ва кўздан кечириш, рақамли далилларни сақлаш, шу жумладан маълумотларни сақлаш (Facebook, Instagram) ҳамда ўзаро ҳуқуқий ёрдам кўрсатиш бўйича сўровни расмийлаштириш каби масалалар қамраб олингани мазкур курснинг амалий натижадорлигини оширди.

Курс якуни бўйича ташкилотчилар томонидан Бош прокуратура Академияси билан ҳамкорликда “Кибержиноятларни тергов қилиш бўйича минтақавий амалий курс” материаллар тўплами ишлаб чиқилди.

Мазкур тўплам ҳуқуқни муҳофаза қилувчи ва бошқа ваколатли органлар ходимларида кибержиноятларни миллий ва трансмиллий даражада тергов қилиш борасидаги комплекс билим ва амалий кўникмаларни шакллантиришга қаратилган.