Диссертация ҳимояси бўлиб ўтди

Жорий йилнинг 8 февраль куни Бош прокуратура Академияси ҳузуридаги Илмий кенгаш йиғилишида Академия докторанти Д.Д. Хамзаевнинг 12.00.07 ихтисослиги бўйича “Трансмиллий молиявий жиноятларга қарши курашишда ҳуқуқни муҳофаза қилувчи органлар фаолиятини такомиллаштириш” мавзусида юридик фанлар бўйича фалсафа доктори (PhD) илмий даражасини олиш учун тайёрлаган диссертациясининг ҳимояси бўлиб ўтди.

Мазкур тадқиқот доирасида трансмиллий молиявий жиноятлар, жумладан жиноий даромадларни легаллаштириш ва терроризмни молиялаштиришга қарши курашишда идоралараро ва халқаро ҳамкорлик ҳамда теркор маълумотлар билан алмашиш механизмларини такомиллаштириш масалалари ўрганилган.

Диссертацияда хорижий давлатларнинг илғор тажрибаси асосида Ўзбекистон Республикаси Жиноят-процессуал кодекси, “Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида”ги Қонуни, “Прокуратура тўғрисида”ги Қонун ва бошқа бир қатор норматив-ҳуқуқий ҳужжатларга таклифлар илгари сурилган.

Диссертация ҳимояси натижасига кўра, Кенгаш аъзолари томонидан тадқиқотчи юридик фанлар бўйича фалсафа доктори (PhD) илмий даражасини олиш учун лойиқ деб топилди.

Академия жамоаси Дилавер Хамзаевни диссертацияни муваффақиятли ҳимоя қилганлиги билан табриклайди ва келгусидаги илмий ва касбий фаолиятида улкан зафарлар тилайди!