Таълим сифатини таъминлашда идоралараро ҳамкорлик

Академияда туман (шаҳар) прокурорларининг ички ишлар органларида қонунчилик ижроси устидан назорат бўйича ўринбосарлари ҳамда ижтимоий ва иқтисодий соҳаларда қонунчилик ижроси устидан назорат бўйича ёрдамчилари учун мажбурий меҳнат ва одам савдосига қарши курашишга оид қонун бузилиши ҳолатларини аниқлаш, ҳужжатларни расмийлаштириш ҳамда ҳуқуқбузарларнинг ҳаракатларига ҳуқуқий баҳо бериш масалаларига бағишланган малака ошириш курси ўтказилмоқда.

Тингловчиларнинг назарий билим ва амалий кўникмаларини мустаҳкамлаш мақсадида ўқув жараёнига Академия профессор-ўқитувчилари билан бир қаторда тегишли вазирлик ва идораларнинг мутахассислари жалб этилмоқда.

Жумладан, мазкур курс доирасида Ўзбекистон Республикаси Бандлик ва меҳнат муносабатлари вазирлиги Давлат меҳнат инспекцияси бошлиғи ўринбосари Г.Ниязметова Академия катта ўқитувчиси А.Аҳмедов билан биргаликда “Мажбурий меҳнат – жавобгарликка тортиш тушунчаси, турлари ва асослари” мавзусида бинар шаклда ўқув машғулоти ўтказди.

Тингловчилар томонидан амалдаги қонунчиликка киритилган ўзгартишлар кўриб чиқилди ва тизимли муаммо ва амалиётдаги камчиликлар, уларни бартараф этиш йўллари муҳокама қилинди. Шунингдек, тингловчилар ўзларини қизиқтирган саволларга жавоб олдилар.