Судларда прокурор ваколатини таъминлаш самарадорлигини ошириш масалаларига бағишланган малака ошириш курси

Туман (шаҳар) прокурорлари ва уларга тенглаштирилган прокурорларнинг ёрдамчилари иштирокида “Судларда прокурор ваколатини таъминлаш самарадорлиги масалалари” мавзусида малака ошириш курси бошланди.

Мазкур малака ошириш курси аралаш таълимнинг “3+1” тизими асосида замонавий педагогик ва ахборот-коммуникация технологияларини қўллаган ҳолда ташкил этилган.

Курс дастуридан ўрин олган ўқув машғулотлари давомида мамлакатимизда амалга оширилаётган суд-ҳуқуқ ислоҳотлари шароитида амалдаги қонунчиликка киритилаётган янгиликлар, конкрет тоифадаги ишларни кўрилишида ягона суд-прокурор амалиётини шакллантириш, соҳада хизмат қилаётган прокуратура ходимларининг вазифалари билан боғлиқ масалалар ёритилади.

Ўқув контенти Академия профессор-ўқитувчилари томонидан прокурорлик амалиётидаги долзарб масалалардан келиб чиққан ҳолда ишлаб чиқилган ва курс мавзуси доирасидаги тақдимот материаллари, амалий мисоллар, тест ва казуслар ҳамда мультимедиа ўқув материалларини ўз ичига олган.

Малака ошириш курсининг якуний босқичида тингловчиларнинг масофадан ўзлаштирган билим ва кўникмалари бевосита аудитория машғулотлари жараёнида тренинг ҳамда ўқитишнинг интерфаол услубларидан фойдаланган ҳолда, муаммоли-вазиятли ҳолатларни таҳлил қилиш ва казуслар ечимини топиш воситасида мустаҳкамланиб, тингловчиларнинг курс дастурини ўзлаштириш даражаси баҳоланади.