Ўрмон хўжалиги давлат қўмитаси ходимлари учун масофавий малака ошириш курси ўтказилди

Коррупцияга қарши курашиш соҳасида давлат органлари ва бошқа ташкилотлар ходимларининг малакасини ошириш Бош прокуратура Академияси фаолиятининг асосий йўналишларидан бири ҳисобланади.

Мазкур фаолият доирасида Академия томонидан Ўзбекистон Республикаси Ўрмон хўжалиги давлат қўмитаси ходимлари учун “Коррупцияга қарши курашиш бўйича самарали идоравий чора-тадбирлар ташкил этилишини таъминлаш” мавзусида қисқа муддатли масофавий малака ошириш курси ўтказилди.

Масофавий курсда иштирок этган Ўрмон хўжалиги давлат қўмитасининг раҳбар ходимлари коррупция тушунчаси, шакллари ва сабаблари, коррупцияга қарши курашиш соҳасида комплаенс-назорат тизимининг ўрни ва аҳамияти, коррупциявий хавф-хатарлар, манфаатлар тўқнашуви ва уни олдини олиш масалалари, давлат хизматчиларининг одоб-ахлоқ қоидалари ва коррупция учун жавобгарлик каби мавзуларда ўз билим ва малакаларини оширишди.

Ўқув курсини ижобий тамомлаган тингловчиларга белгиланган намунадаги сертификатлар тақдим этилди.

Ҳозирда Ўрмон хўжалиги давлат қўмитаси ва унинг тизимидаги ташкилотларнинг бошқа ходимларини масофавий шаклда ўқитиш ишлари давом этмоқда.