“Ижтимоий фикр” Маркази билан ҳамкорликнинг янги босқичи

2020 йил 28 августда Ўзбекистон Республикаси Бош прокуратураси Академияси ҳамда “Ижтимоий фикр” республика жамоатчилик фикрини ўрганиш маркази ўртасида ўзаро ҳамкорлик тўғрисида меморандум имзоланди.

Ушбу ташаббус доирасида социологик тадқиқотлар ўтказиш, илмий-тадқиқот лойиҳаларини ишлаб чиқиш ва уларни амалга ошириш, информацион-таҳлилий ишларни ҳамкорликда амалга ошириш бўйича келишувга эришилди.

Хусусан, суд-ҳуқуқ соҳасидаги ислоҳотларни амалга ошириш самарадорлигини ўрганиш юзасидан социологик ва ижтимоий-психологик тадқиқотларни биргаликда ўтказиш, Марказ мутахассисларининг Академияда ўтказиладиган илмий изланишларда ва ўқув машғулотларида иштирок этиши, Академия профессор-ўқитувчиларининг Марказ томонидан ўтказиладиган тадқиқотларни таҳлил қилиш жараёнида эксперт сифатида жалб этилиши каби ҳамкорлик шакллари назарда тутилган.

Таъкидлаш лозимки, Академия билан “Ижтимоий фикр” Маркази ўртасида биргаликдаги тадбирлар ўтказиш борасида яқин ҳамкорлик ўрнатилган бўлиб, “Ижтимоий фикр” Маркази ходимлари Академиянинг халқаро лойиҳаларни амалга ошириш гуруҳлари ишида фаол иштирок этиб келмоқдалар, Марказ социологик тадқиқотлари материаллари Академия ходимлари томонидан олиб борилаётган илмий ишларда муваффақиятли қўлланилмоқда.

Меморандумнинг имзоланиши икки томонлама ҳамкорликнинг ривожланишига янги куч беради.