Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш масалаларига бағишланган халқаро конференция

2022 йил 3 июнь куни Тошкент шаҳрида “Жиноий фаолиятдан олинган даромадларни легаллаштириш ва терроризмни молиялаштириш: замонавий таҳдидлар ва уларга қарши курашишнинг долзарб масалалари” мавзусида халқаро илмий-амалий конференция бўлиб ўтди.

Конференция Ўзбекистон Республикаси Президентининг 2021 йил 28 июндаги “Ўзбекистон Республикасининг жиноятчилик, терроризмни молиялаштириш ва оммавий қирғин қуролларини тарқатишни молиялаштиришга қарши курашиш миллий тизимини ривожлантириш стратегиясини тасдиқлаш тўғрисида”ги ПФ–6252-сон қарорига мувофиқ ташкил этилди.

Конференция Бош прокуратура Академияси, Бош прокуратура ҳузуридаги Иқтисодий жиноятларга қарши курашиш департаменти ҳамда Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича Евроосиё гуруҳи ҳамкорлигида ЕХҲТнинг Ўзбекистондаги лойиҳалари координатори офиси кўмагида Евроосиё гуруҳининг 36-ялпи мажлиси доирасида ташкил этилди.

Конференция ишида 120 дан ортиқ халқаро ташкилотлар вакиллари, соҳага алоқадор Ўзбекистон давлат идоралари мутахассислари, хорижий давлатлар мутахассислари, олимлар ва тадқиқотчилар иштирок этди.

Тадбирда сўзга чиққан Евроосиё гуруҳининг раиси Ю.Чиханчин Ўзбекистонда соҳада эришилган сезиларли ижобий ўзгаришларни, шу жумладан, қонунчиликни такомиллаштириш, самарали халқаро ва идоралараро ҳамкорликни ўрнатиш борасидаги натижаларни таъкидлаб ўтиб, бу ўз навбатида замонавий таҳдидларнинг олдини олишда муҳим аҳамият касб этишини қайд этиб ўтди.

Анжуманда шунингдек Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти бошлиғи Д.Рахимов, Бош прокуратура Академияси бошлиғи Е.Коленко, Россия Федерацияси Федерал молиявий мониторинг хизмати ҳузуридаги молиявий мониторинг халқаро ўқув-услубий маркази бош директори М.Андронова, ЦАРИКС директори Р.Мирализода ҳамда бошқа етакчи экспертлар ҳамда амалиётчилар сўзга чиқдилар.

Aнжуманда соҳада халқаро стандартларни жорий этишнинг энг долзарб масалалари, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш тизимини мустаҳкамлашда ҳуқуқни муҳофаза қилувчи ва назорат қилувчи органларнинг роли, шунингдек, халқаро ҳамкорликни ривожлантириш масалалари муҳокама қилинди.

Ўзбекистон Республикаси Бош прокуратураси Академиясига Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш халқаро тармоқ институтини ҳамда миллий тизимлар учун кадрлар тайёрлаш соҳасидаги халқаро ҳамкорликни ривожлантиришга қўшган ҳиссаси учун ёзма миннтадорчилик топширилди.

Халқаро конференция экспертлар ва амалиётчилар учун кун тартибидаги долзарб масалаларни муҳокама қилиш ва улар бўйича тажриба алмашиш учун қулай имконият яратиб берди.