Активларни қайтариш бўйича идоралараро тармоқлар вакилларининг учрашувида иштирок этилди

Бош прокуратура Академияси вакили Ғарбий ва Марказий Осиё давлатларининг активларни қайтариш бўйича ноформал тармоғи (ARIN-WCA) Котибиятининг вазифаларини амалга ошириши доирасида Европанинг CARIN тармоғи томонидан Гаага шаҳрида (Нидерландия) ташкиллаштирилган активларни қайтариш бўйича ноформал тармоқларнинг (ARIN) котибиятлари ва раислик қилувчи давлатлари вакилларининг учрашувида иштирок этди.

Европолнинг штаб-квартирасида ўтказилган мазкур учрашувда Европа (CARIN), Осиё ва Тинч океани (ARIN-AP), Кариб ҳавзаси (ARIN-CARIB), Шарқий Африка (ARIN-EA), Ғарбий Африка (ARIN-WA), Жанубий Африка (ARINSA), Лотин Америкаси (RRAG), Ғарбий ва Марказий Осиё (ARIN-WCA) минтақаларида ҳозирги кунда фаолият юритаётган тармоқларнинг котибиятлари ва раислик қилувчи давлатлари вакиллари, Европол, Еврокомиссия, ФАТФ, БМТнинг Наркотиклар ва жиноятчилик бўйича бошқармаси, GIZ фонди ҳамда АҚШ Адлия департаменти экспертлари қатнашишди.

Тадбир иштирокчилари уюшган жиноятчиликка қарши курашишнинг асосий таркиби сифатида активларни қайтариш бўйича ноформал тармоқларнинг ўрни ва аҳамиятини эътироф этишиб, ушбу тармоқларнинг самарадорлигини янада ошириш, давлатларнинг активларни қайтариш соҳасидаги алоқаларининг муҳимлилиги, самарали ҳамкорликни амалга ошириш ва мавжуд муаммоларни биргаликда бартараф этиш мақсадида иштирок этувчи давлатлар доирасини кенгайтириш, асосий вазифа ва йўналишларни белгилаш, профессионал алоқаларни ўрнатиш ва уларни янада чуқурлаштириш, мазкур соҳадаги янги билим ва тажрибалар билан алмашиш каби масалаларни муҳокама қилишди.

Учрашув доирасида ARIN-WCA номидан, тармоқда жорий йилда раислик қилувчи давлат – Покистон (Миллий ҳисоб бюроси) ҳамда тармоқнинг доимий Котибияти Бош прокуратура Академияси вакиллари томонидан ARIN-WCAнинг фаолияти, амалга оширилган ишлар ва истиқболли режалар юзасидан презентация қилинди.

Тадбир иштирокчиларида айниқса ARIN-WCA томонидан тармоққа аъзо давлатларнинг активларни қайтариш бўйича қонунчилиги ва амалиётини ўзаро ўрганиш бўйича олиб бораётган ташаббуси (Peer Review) катта қизиқиш уйғотди. ARIN тармоқлари вакиллари ARIN-WCAнинг ушбу ижобий тажрибасини ўрганиш ва ўзларида ҳам ушбу жараённи қўллаш кераклигини таклиф қилишди.

Учрашувда шунингдек RRAG (Лотин Америкаси) ва ARIN-CARIB (Кариб давлатлари) тармоқлари котибиятлари томонидан ARIN-WCAнинг ушбу тармоқларга кузатувчи сифатида қўшилганлиги тасдиқланди. Бу эса ўз навбатида ARIN-WCA аъзоларининг Кариб ҳавзаси ва Лотин Америкаси юрисдикциялари билан ҳамкорлик географиясини кенгайтириш учун хизмат қилади.

Учрашув якунлари бўйича иштирокчилар томонидан келгусида муҳокама қилинадиган муҳим масалалар белгилаб олинди, фаол ҳамкорлик қилиш ва ARIN доирасида алоқаларни янада мустаҳкамлашга тайёр эканликлари билдирилди.