Конфликт-менежмент бўйича жойларда тренинглар ўтказилди

Ўзбекистон Республикаси Президентининг 2018 йил 8 майдаги ПФ–5438 сон Фармонига мувофиқ, Бош прокуратура Академиясига прокуратура органлари фаолиятини психологик жиҳатдан таъминлаш, прокуратура органларидаги маънавий-психологик муҳитни ўрганиш ва уни яхшилаш юзасидан тавсиялар ишлаб чиқиш вазифаси қўйилган.

Мазкур вазифалар ижроси доирасида Бухоро вилояти прокуратураси ташаббуси билан Академиянинг психологик таъминлаш бўлими томонидан аҳоли билан мулоқот давомида юзага келувчи  низоли ва кескин вазиятларни бошқаришга йўналтирилган “Конфликт-менежмент” мавзусида тренинг дастури ишлаб чиқилди.

2022 йилнинг июнь ойи давомида Бухоро вилояти ва вилоятнинг туман прокуратуралари ходимлари учун тренинглар ўтказилди. Тренингда мурожаатчилар билан мулоқот давомида юзага келувчи зиддиятли вазиятларни бошқариш, низоли вазиятларни юмшатиш бўйича бирламчи кўникма ва малакаларни шакллантиришга эътибор қаратилди.

Шунингдек, мазкур тренинг машғулотлари Хоразм, Сирдарё, Самарқанд, Тошкент вилояти ва Тошкент шаҳри прокуратуралари ходимлари иштирокида ҳам ташкил этилди.

Тренинг давомида олинган билимлар ва шаклланган кўникмалар прокурорларнинг кундалик касбий фаолиятини самарали бажаришда ҳам фойдали бўлади.