Бош прокуратура Академияси битирувчиларига дипломлар топшириш маросими бўлиб ўтди

2022 йил 12 август куни Бош прокуратура Академияси магистратурасини 2021/2022 ўқув йилида тамомлаган магистрларга ҳамда раҳбарлик лавозимларни эгаллаш учун захирада турган кадрларни касбий қайта тайёрлаш курси битирувчиларига дипломлар топшириш маросими ўтказилди.

Тадбирда Бош прокуратура, Академия раҳбарияти ва ходимлари, раҳбар кадрларни қайта тайёрлаш курси битирувчилари, магистрлар ва уларнинг ота-оналари, ОАВ ходимлари иштирок этди.

Тадбирни Бош прокурор ўринбосари Э.Юлдашев кириш сўзи билан очиб, Академиянинг магистрларини, шунингдек прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курслари битирувчиларини Бош прокуратура раҳбарияти номидан самимий табриклади ҳамда Академияда фан, таълим ва амалиётнинг узвий боғлиқлиги тамойили асосида кадрлар тайёрлашни ташкил этишнинг ўзига хос хусусиятларини қайд этиб ўтди.

Хусусан, Академияда халқаро андозалар асосида юқори сифатли касб-ҳунар таълими олиш учун ҳам, ҳуқуқшуносликнинг ноёб ва долзарб йўналишлари бўйича илмий-тадқиқот фаолиятини амалга ошириш учун ҳам замонавий шароитлар яратилгани алоҳида таъкидланди.

Академия раҳбари Е.Коленко битирувчиларнинг Лунд университетида (Швеция) академик мобиллик дастурлари бўйича муваффақиятли таълим олиш, илмий-тадқиқот фаолиятини амалга ошириш ва илмий мақолалар чоп этиш, семинарлар, конференцияларда қатнашиш каби алоҳида ютуқларини қайд этиб ўтди.

Академия битирувчиларига бутун меҳнат фаолиятлари давомида ўз малакаларини ошириб бориш ва илмий фаолият билан шуғулланишларини тавсия қилди.

40 нафар магистратура битирувчиларига “Ҳуқуқ магистри” дипломи ҳамда раҳбар кадрларни қайта тайёрлаш курсининг 15 нафар битирувчиларига касбий қайта тайёрлаш дипломи ва кўкрак нишонлари топширилди.

Шунингдек, якуний давлат аттестация синови ҳамда магистрлик диссертацияси ҳимоясини муваффақиятли ўтиб, алоҳида ижобий ютуқларни қўлга киритган икки нафар магистрга эсдалик совғалари топширилди.

Тадбирда сўзга чиққан Академия битирувчилари ва уларнинг ота-оналари ушбу таълим даргоҳида касбий билим ва кўникмаларни ошириш, илмий фаолият олиб бориш борасида яратилган шароит ва имкониятларни юқори баҳолаб, Бош прокуратура ҳамда Академия раҳбарияти, профессор-ўқитувчиларига чуқур миннатдорчилик изҳор қилдилар.