Бош прокуратура Академияси магистратурасида таништирув ҳафталиги

Жорий йилнинг 5-9 сентябрь кунлари Академия магистратурасининг 2022/2023 ўқув йили тингловчилари учун таништирув ҳафталиги ўтказилди.

“Прокурорлик фаолияти”, “Тергов фаолияти”, “Коррупцияга қарши курашиш”, “Инсон ҳуқуқларига оид халқаро ҳуқуқ” мутахассисликлари учун ўтказилган ҳафталик доирасида тингловчиларни Академия ўқув-илмий жараёнини ташкиллаштиришга оид маълумотлар билан таништириш мақсадида бир қатор тадбирлар ўтказилди.

Хусусан, тингловчилар Академияда назарий ва амалий машғулотларни ўтказиш учун яратилган замонавий талабларга жавоб берадиган шароитлар, махсус ўқув хоналари ва полигонлар, ички тартиб-қоидалари, кредит-модуль тизимининг афзалликлари ҳамда академик мобиллик дастурлари доирасида хорижий таълим муассасаларида ўқиш имкониятлари билан яқиндан танишдилар.

Ҳафталик якунида Бош прокуратура биносида тингловчиларнинг
Бош прокуратура, Кадрлар бошқармаси ва Академия раҳбарияти билан учрашуви ташкил этилди.

Учрашувда Ўзбекистон Республикаси Бош прокурорининг ўринбосари Э.Юлдашев сўзга чиқиб, ўқишга тавсия этилган тингловчиларни танловлардан муваффақиятли ўтгани муносабати билан Бош прокуратура раҳбарияти номидан табриклаб, келгусидаги ўқишларида  муваффақият ва улкан зафарлар тилади.

Академия бошлиғи Е.Коленко томонидан ўқув жараёнининг халқаро стандартлар асосида ташкил этилишининг ўзига хос жиҳатлари, Академияда жорий этилган инновацион ўқитиш усуллари, академик мобиллик дастурлари ва Академияда ўқишнинг бошқа афзалликлари ҳақида учрашув иштирокчиларига маълумотлар берилди.

Академия магистратурасида 2022/2023 ўқув йили жорий йилнинг 12 сентябридан бошланади.