“Жабрланувчи ҳуқуқларини ҳимоя қилиш” мавзусидаги ўқув модули машғулотлари бошланди

Бош прокуратура Академияси магистратурасининг “Инсон ҳуқуқларига оид халқаро ҳуқуқ” йўналиши талабалари учун “Жабрланувчи ҳуқуқларини ҳимоя қилиш” мавзусидаги модули доирасидаги  ўқув машғулотлари бошланди.

Мазкур ўқув модули жабрланганларнинг халқаро ҳуқуқдаги мақоми, уларнинг ҳуқуқларини ҳимоя қилиш бўйича халқаро хужжатларнинг мазмун-моҳияти, виктимологиянинг муҳим тамойиллари, жабрланган шахсларнинг ҳуқуқ ва эркинликларини ҳимоя қилиш, жабрланувчи ва гувоҳларни ҳимоя қилиш, жабрланувчиларга етказилган моддий ва маънавий зарарларни қоплаш, шунингдек одам савдоси, оиладаги зўравонлик ва қийноқдан жабрланганларнинг ҳуқуқларини ҳимоя қилишнинг ўзига хос хусусиятлари ва бошқа долзарб масалаларни қамраб олган.          

Шу билан бирга, мазкур йўналишда таҳсил олаётган магистратура талабалари учун виктимиологияга оид асосий концепциялар, халқаро стандартлар ва амалиёт бўйича маърузалар, шунингдек назарий билим ва амалий кўникмаларни ривожлантириш мақсадида имитацион машқлар ўтказилади.

Ўқув модули доирасида шунингдек одам савдоси жабрдийдаларига ёрдам бериш бўйича Республика реабилитация маркази, Маҳалла ва оилани кўллаб-қувватлаш вазирлиги ҳузуридаги Тошкент шаҳар Аёлларни реабилитация қилиш ва мослаштириш марказида сайёр машғулот ва танишув дарслари ўтказилиши назарда тутилган.