Туркия делегациясининг ташрифи

Адлия вазири ўринбосари Хасан Йилмаз бошчилигидаги Туркия делегацияси Ўзбекистонга ташрифи доирасида 2022 йил 20 сентябрь куни Бош прокуратура ҳамда Академияга ташриф буюрди.

Ушбу ташриф Ўзбекистон Республикаси Бош прокуратураси Академияси ва Туркия Адлия Академияси ўртасидаги академик ҳамкорлик доирасида прокуратура кадрларини тайёрлаш, қайта тайёрлаш ва малакасини ошириш борасида тажриба алмашиш мақсадида ташкил этилди.

Делегациянинг Бош прокуратура ҳамда Академия раҳбарияти билан учрашуви давомида прокурор-тергов кадрларини тайёрлаш ва малакасини ошириш масалалари бўйича тажриба алмашинилди.

Делегация вакиллари Бош прокуратура Академияси фаолияти, замонавий ахборот технологияларини қўллаган ҳолда таълим жараёнининг ташкил этилиши, амалий кўникма ва малакаларни шакллантиришга қаратилган замонавий таълим инфратузилмаси билан яқиндан танишдилар.

Ўзбекистон Республикаси Бош прокуратураси Академияси ва Туркия Адлия Академияси ўртасида Англашув меморандуми имзоланиб, кадрлар салоҳиятини ошириш борасида икки томон ҳамкорлиги даражасини янги поғонага кўтаришга асос солинди. Томонлар ўзаро ҳамкорликнинг кейинги чора-тадбирлари бўйича келишувга эришдилар.

Делегациянинг Бош прокуратура Академиясига ташрифи дастури доирасида “Жиноий суд ишларини юритишда прокурор фаолиятининг долзарб масалалари” мавзусида давра суҳбати ўтказилиши режалаштирилган.