Шахс ҳуқуқларини суд орқали ҳимоя қилиш масалаларига бағишланган малака ошириш курси

Бош прокуратура Академиясида шахс ҳуқуқларини суд орқали ҳимоя қилиш ва ушбу жараёнда прокурор роли масалалари бўйича туман (шаҳар) прокурорлари ёрдамчилари ва уларга тенглаштирилган прокурорларнинг малакасини ошириш курси йўлга қўйилди.

Курс дастури шахс ҳуқуқлари ва қонуний манфаатларини суд орқали ҳимоя қилиш, маъмурий судлар ҳамда иқтисодий ва фуқаролик ишлари бўйича судларда ишларни кўриш хусусиятлари ва тегишли тоифадаги ишларни кўришда прокурор иштирокининг муҳим жиҳатларини ўз ичига олади.

Ўқув машғулотлари давомида тингловчиларга ушбу соҳадаги қонунчиликка киритилаётган янгиликлар, шахс ҳуқуқларини суд орқали самарали ҳимоя қилиш механизмлари тушунтирилади ҳамда ҳуқуқни қўллаш амалиётидаги мавжуд муаммолар ва уларни бартараф этиш йўллари кўриб чиқилади.

Тасдиқланган дастур асосида ўтказилаётган ўқитишнинг масофавий шаклида ҳар ўқув ҳафтасининг якуни бўйича ташкиллаштирилиши назарда тутилган синхрон ўқув машғулотлари давомида ҳафталик ўзлаштиришни мониторинг қилиб бориш билан бирга, амалдаги қонунчилик талаблари ҳамда мавзу доирасидаги саволларга тушунтириш бериш режалаштирилган.

Курсининг якуний босқичида тингловчиларнинг масофадан ўзлаштирган билим ва кўникмалари бевосита аудитория машғулотлари жараёнида ўқитишнинг интерфаол услублари ҳамда тренингдан фойдаланган ҳолда, муаммоли-вазиятли ҳолатларни таҳлил қилиш ва казуслар ечимини топиш воситасида мустаҳкамланади.