Бош прокуратура Академияси магистратурасининг сиртқи тингловчилари учун таништирув тадбирлари ўтказилди

Академия магистратурасининг 2022/2023 ўқув йили “Прокурорлик фаолияти” мутахассислиги бўйича сиртқи таълим шакли тингловчилари учун таништирув тадбирлари ташкил этилди.

Тадбирда тингловчиларга Академия магистратурасининг сиртқи таълим шакли учун махсус тайёрланган “Proacademy” ахборот-таълим порталида ўқишни ташкил этишнинг умумий тартиби ва қоидалари, ўқув модуллари тавсифи, тингловчилар билимини баҳолаш тартиби ҳақида амалий кўргазмалар билан батафсил маълумотлар берилди.

Шунингдек, тадбирда тингловчиларга магистрлик диссертацияси мавзуларини танлашда эътибор қаратилиши лозим бўлган жиҳатлар, тадқиқот услублари ва диссертация ишини тайёрлашга қўйиладиган умумий талаблар бўйича маҳорат дарслари ташкил этилди. 

Шундан сўнг тингловчилар Ўзбекистон прокуратураси тарихи музейига ташриф буюришди. Таништирув дастури якунида ҳар бир тингловчининг шахсий электрон портфолио яратиш мақсадида тингловчиларнинг билим ва кўникмалари махсус диагностикадан ўтказилди.

Академия магистратурасида сиртқи таълим шакли учун дарс машғулотлари жорий йилнинг 10 октябридан бошланади.