Жиноий активларни қайтариш бўйича ARIN-AP тармоғининг халқаро ўқув тренингида иштирок этилди

Ўзбекистон Республикаси Бош прокуратураси Академияси вакили Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) Котибиятининг вазифаларини амалга ошириши доирасида жорий йилнинг 5-6 октябрь кунлари Кореянинг Сеул шаҳрида ўтказилган Осиё-Тинч океани минтақаси давлатларининг активларни қайтариш бўйича идоралараро тармоғининг (ARIN-AP) 7чи халқаро ўқув тренингида иштирок этди.

Тренинг ARIN-APнинг доимий Котибияти – Корея Бош прокуратураси томонидан ташкиллаштирган. Унда Австралия Федерал полицияси, Кайман ороллари қироллик полицияси, Интерпол вакиллари, шунингдек ARIN-AP тармоғи аъзо-давлатлари ва кузатувчилари: Вьетнам, Индонезия, Камбоджа, Малайзия, Монголия, Непал, Сингапур, Тайвань, Таиланд, Филиппин, Янги Зелландия, Ҳиндистон ҳамда Ўзбекистон ҳуқуқни муҳофаза қилувчи ва активларни қайтариш масалалари бўйича махсус органлари ходимлари иштирок этишди.

Тадбир давомида иштирокчилар жиноий активларни қидириш, аниқлаш, ҳисобларни музлатиш, уларга таъқиқ қўйиш, хатлаш, мусодара қилиш ва бошқариш усуллари, ушбу соҳадаги қонунчилик нормалари, халқаро ҳамкорлик масалалари ҳамда Австралия, Кайман ороллари, Корея Республикаси тажрибаси билан таништирилди. Шунингдек тренинг давомида иштирокчилар экспертлар билан биргаликда реал ишларни (кейс) муҳокама қилишиб, активларни қайтариш бўйича ўз миллий тизими ва ижобий тажрибаси тўғрисида тақдимотларини амалга оширишди.

Ўз навбатида ARIN-WCA Котибияти номидан Бош прокуратура Академияси вакили тренинг қатнашчиларига ARIN-WCA тармоғининг фаолияти, унинг мақсади ва асосий вазифалари, ташкилий тузилиши, иштирокчилари, тармоқ доирасида амалга оширилган ишлар ва ўтказилган ўқув тренинглар, олдинда турган стратегик вазифалар ҳақида тақдимот қилди.