Юридик атамашуносликда янги луғат

Юридик фанлар доктори, академик А.Х.Саидов масъул муҳаррирлиги остида Ўзбекистон Республикаси Фанлар академияси Давлат ва ҳуқуқ институти, Инсон ҳуқуқлари бўйича миллий маркази, Бош прокуратура Академияси, ИИВ Академияси, Жамоат хавфсизлиги университети мутахассисларидан иборат муаллифлар жамоаси томонидан “Ўзбек юридик атамаларининг изоҳли луғати” тайёрланди ва нашрдан чиқарилди.

3500 дан ортиқ юридик атамаларни ўзида жамлаган ушбу изоҳли луғатда ҳуқуқий амалиёт ва назария, турдош бўлган бошқа фан йўналишларида кенг қўлланиладиган ҳуқуқий, тарихий ва замонавий атамалар ҳам ўрин олган. Луғат сўнгги йилларда амалга оширилаётган ислоҳотлар жараёнида соҳага киритилган атамаларнинг таърифлари ҳам ўз ичига олади.

Мазкур нашр луғатшуносликнинг илмий талаблари ва ўзига хос хусусиятларидан келиб чиққан ҳолда тайёрланган бўлиб, ҳуқуқшунослик соҳасидаги талабалар, докторантлар ва мустақил изланувчилар, давлат хизматчилари, депутатлик корпуси, ўқитувчилар ва илмий ходимлар, шунингдек, кенг китобхонлар оммаси учун фойдали манба бўлиб хизмат қилади.