Академияда криптовалюталар ва Darknet тармоғидан фойдаланган ҳолда содир этилган жиноятларни тергов қилиш масалалари бўйича тренинг ўтказилди

2022 йил 17-21 октябрь кунлари Бош прокуратура Академияси томонидан ЕХҲТнинг Ўзбекистондаги лойиҳалари координатори офиси билан ҳамкорликда Бош прокуратура, Ички ишлар вазирлиги ва Давлат хавфсизлик хизмати вакиллари иштирокида криптовалюталар ва Darknet тармоғидан фойдаланган ҳолда содир этилган жиноятларни тергов қилиш масалалари бўйича тренинг ташкил этилди.

Тренинг дастури кибержиноятчилик соҳасида таълим ва ўқитиш бўйича Европа гуруҳи (ECTEG) томонидан ишлаб чиқилган материалларга асосланган бўлиб, соҳа мутахассислари учун тармоқлараро ҳамкорлик, анонимлик ва рақамлаштириш, Darknet ва Tor тармоғида рақамли далилларни излаш ва олиб қўйиш усуллари соҳасидаги асосий концепциялар ва муҳим тенденцияларга оид бир қатор долзарб масалаларни ўз ичига олади.

Тренинг иштирокчилари амалий машғулотлар давомида криптовалюталарни олиб қўйиш, блокчейн технологиясининг ишлашини таҳлил қилиш ва Darknet тармоғида рақамли изларни қидириш бўйича ёндашув ва усулларни ишлаб чиқдилар.

Тадбир Академияда ЕХҲТнинг Ўзбекистондаги лойиҳалари координатори офиси кўмагида бир неча кун аввал очилган Dark Web лабораторияси негизида ташкил этилган биринчи тренинг бўлди.

Академия томонидан кибержиноятлар бўйича мутахассисларнинг касбий маҳоратини оширишга қаратилган ўқув тадбирлари тизимли асосда амалга оширилади.