Ноқонуний молиявий оқимларни ўлчаш бўйича салоҳиятни мустаҳкамлаш юзасидан семинар-тренинг ташкил этилди

Бош прокуратура Академияси БМТ ГЖБ, БМТ савдо ва тараққиёт конференцияси (ЮНКТАД) ва Осиё ва Тинч океани учун иқтисодий ва ижтимоий комиссия (ЭСКАТО) томонидан амалга оширилаётган ноқонуний молиявий оқимларни ўлчашда Осиё-Тинч океани минтақасидаги мамлакатларни қўллаб-қувватлаш бўйича тажриба лойиҳасида иштирок этмоқда.

Ўзбекистон Республикаси Вазирлар Маҳкамасининг 2022 йил 21 февралдаги “2030 йилгача бўлган даврда барқарор ривожланиш соҳасидаги миллий мақсад ва вазифаларни амалга оширишни жадаллаштириш бўйича қўшимча чора-тадбирлар тўғрисида” 83-сон қарорига асосан Миллий барқарор ривожланиш мақсадларининг “Самарали бошқарув” йўналиши бўйича экспертлар гуруҳи ташкил этилган.

Ҳозирда барқарор ривожланиш соҳасидаги миллий мақсад ва вазифаларнинг 16.4-вазифасида белгиланган 2030 йилгача ноқонуний пул ва қурол-яроғ оқимларини жиддий равишда қисқартириш, ўғирланган активларни излаб топиш ва қайтариш бўйича ишларни жонлантириш ва уюшган жиноятчиликнинг барча шаклларига қарши кураш олиб боришни таъминлаш бўйича методология ва кўрсатмалар такомиллаштирилмоқда.

Юқорида келтирилган лойиҳанинг мақсади ноқонуний молиявий оқимларни ўлчаш учун статистик салоҳиятни мустаҳкамлашдан иборат. Лойиҳада тегишли идоралар томонидан маълумотларни баҳолаш, ноқонуний фаолият турлари бўйича махсус методикалардан фойдаланиш ва тегишли ўқув тадбирлари ўтказиш назарда тутилган.

Лойиҳа доирасида вужудга келган масалаларга аниқлик киритиш мақсадида жорий йилнинг 27-28 октябрь кунлари Бош прокуратура Академиясида ЭСКАТО экспертлари Алик Мджума Ньясулу, Анастасия Мага ва Айоделе Маршалл иштирокида семинар-тренинг ташкил этилди.

Семинар-тренингда Бош прокуратура, Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги, ДБҚ, ДСҚ, Давлат статистика қўмитаси, Прогнозлаштириш ва макроиқтисодий тадқиқотлар институти масъул вакиллари иштирок этди.

Мазкур семинар соҳа мутахассислари салоҳиятини мустаҳкамлаш, илғор хорижий тажрибани ўрганиш ва амалиётга татбиқ этиш ҳамда Миллий мақсад ва вазифаларнинг 16.4-вазифасини бажарилиши самарадорлигини оширишга муҳим аҳамият касб этади.