Туман (шаҳар) прокурорлари ўринбосарлари учун малака ошириш курси бошланди

Бош прокуратура Академиясида туман (шаҳар) прокурор ўринбосарлари учун “Ички ишлар органларида қонунчилик ижроси устидан назоратни ташкил этиш” мавзусида ўқитишнинг аралаш шаклидаги малака ошириш курси ўз ишини бошлади.

Ўқув курсининг очилишида Бош прокурорнинг биринчи ўринбосари Б.Б.Валиев иштирок этиб, ушбу ўқув курсининг ўтказиш зарурияти, курснинг мақсад ва вазифалари ҳамда қонун устуворлиги, инсон ҳуқуқлари ва жамоат хавфсизлигини таъминлашда ходимларнинг доимий малакасини оширишнинг аҳамиятини қайд этди.

Шунингдек, очилишда Бош прокуратура Академияси бошлиғи Е.В.Коленко, Ички ишлар органларида қонунчилик ижроси устидан назорат бошқармаси бошлиғи Б.Б.Бабаджанов, бошқарманинг бошқа ходимлари, Академия масъул ходимлари ва профессор-ўқитувчилари қатнашишди.

Видеоконференцалоқа воситасида вилоят прокурорлари ва уларга тенглаштирилган прокурорларнинг ўринбосарлари, туман (шаҳар) прокурорлари ўринбосарлари, шунингдек, ички ишлар органларида қонунчилик ижроси устидан назорат тармоқлари ходимлари иштирок этди.

Мазкур малака ошириш курси тингловчиларда ички ишлар органларида қонунчилик ижроси устидан прокурор назоратини ташкил этиш, хусусан, ички ишлар органларида жиноятга оид аризалар, хабарларни кўриб чиқиш ва ҳал этиш бўйича процессуал тартибнинг ижроси ҳамда қабул қилинаётган қарорлар қонунийлиги устидан назорат, суриштирув ва дастлабки тергов фаолиятида қонунларга риоя этилиш устидан назорат, тезкор-қидирув фаолияти устидан назорат, ҳуқуқбузарлик профилактикасига оид қонунлар ижроси устидан назоратни ташкил этишга оид назарий билимларини, шунингдек уларни қўллаш бўйича амалий кўникмаларни ривожлантиришга қаратилган.

Ўқув курсининг масофавий қисмини тугатгандан сўнг, тингловчилар олинган билим ва кўникмаларини мустаҳкамлаш мақсадида Академияда кундузги таълим шаклида ўқишни давом эттирадилар.