Академия профессори, ю.ф.д. Бахтиёр Халилович Пўлатовнинг 75 йиллик юбилейи муносабати билан давра суҳбати ўтказилди

2022 йил 10 ноябрь куни ҳуқуқшунос олим, Ўзбекистон Республикаси прокуратурасининг Фахрий ходими, юридик фанлар доктори, профессор, жонкуяр ва фидойи устоз, Ўзбекистон Республикаси Бош прокуратураси Академияси профессори Пўлатов Бахтиёр Халиловичнинг 75 йиллик юбилейи муносабати билан давра суҳбати ўтказилди.

Прокуратура органларида узоқ йилик меҳнат фаолияти давомида ўзини юқори малакали мутахассис, тажрибали ва масъулиятли ходим сифатида намоён этган, кўп йиллик амалий, илмий ва педагогик тажрибага эга бўлган устоз Б.Х.Пўлатовнинг илмий фаолияти ва амалий тажрибаларини ўрганиш мақсадида ташкил этилган мазкур давра суҳбатида Ўзбекистон Республикаси Бош прокуратураси ва Академияси ходимлари, тингловчилари, ички ишлар идораларининг ходимлари, Судьялар олий мактаби, Тошкент давлат юридик университети, Жамоат хавфсизлиги университети, Юристлар малакасини ошириш маркази ва оммавий ахборот воситаларининг вакиллари иштирок  этдилар.

Тадбир иштирокчилари илмий фаолияти давомида кўплаб дарсликлар, илмий-амалий қўлланмалар, илмий ва илмий-оммабоп мақолалар муаллифи, Ўзбекистон Республикаси Жиноят-ижроия кодексига шарҳлар тайёрлаш бўйича муаллифлар жамоаси аъзоси Б.Х.Пўлатов муаллифлигида нашр этилган китоблар кўргазмаси билан танишиш имконига эга бўлдилар.

Тадбирда сўзга чиққанлар кун қаҳрамонининг прокуратура ва умуман ҳуқуқни муҳофаза қилиш органларида илмий-тадқиқот фаолиятини ривожлантиришдаги хизматларини алоҳида таъкидладилар. Бахтиёр Халилович кўп йиллик илмий фаолияти давомида суд-ҳуқуқ соҳасида кўплаб изланувчиларга илмий раҳбарлик қилган.

Бой илмий ва амалий тажрибага эга бўлган, тажрибали устознинг бугунги кунда Бош прокуратура Академиясида прокуратура органлари ходимлари малакасини ошириш ва қайта тайёрлашнинг замонавий тизимини ташкил этишда, илмий ходимларни тайёрлашда ҳамда ўқув жараёнлари ва илмий муҳит ривожига муносиб ҳисса қўшиб келаётганлиги алоҳида эътирофга лойиқ.

Академия жамоаси Бахтиёр Халиловични юбилей билан табриклаб, унга мустаҳкам соғлик, узоқ умр, кўтаринки кайфият, оилавий фаровонлик ва иш фаолиятида улкан муваффақиятлар тилайди!