Туркий давлатлар ташкилотига аъзо мамлакатларнинг прокурор ва судьялар тайёрлаш бўйича таълим муассасалари ўртасида англашув меморандуми имзоланди

Туркиянинг Истанбул шаҳрида Туркий давлатлар ташкилотига аъзо мамлакатларнинг суд-ҳуқуқ таълим муассасалари ўртасида Туркий суд-ҳуқуқ таълими тармоғи тўғрисида англашув Меморандумини имзолаш маросими бўлиб ўтди.

Тадбирда Ўзбекистон Республикаси Бош прокурорининг ўринбосари Ш.А. Аминов бошчилигидаги Ўзбекистон Республикаси Ҳуқуқни муҳофаза қилиш академияси ва Судьялар олий кенгаши ҳузуридаги Судьялар олий мактаби раҳбарияти ҳамда масъул ходимларидан иборат юртимиз делегацияси иштирок этди.

Англашув Меморандуми Озарбайжон Республикаси Aдлия вазирлигининг Aдлия академияси, Озарбайжон Республикаси Бош прокуратураси илмий-таълим маркази, Қозоғистон Республикаси Олий суди ҳузуридаги Одил судлов академияси, Қозоғистон Республикаси Бош прокуратураси ҳузуридаги Ҳуқуқни муҳофаза қилиш академияси, Қирғизистон Республикаси Олий суди ҳузуридаги Олий судлов мактаби, Қирғизистон Республикаси Бош прокуратураси ҳузуридаги Прокуратура ва тергов ходимларининг малакасини ошириш маркази, Туркия Адлия академияси, Ўзбекистон Республикаси Ҳуқуқни муҳофаза қилиш академияси, Ўзбекистон Республикаси Судьялар олий кенгаши ҳузуридаги Судьялар олий мактаби томонидан имзоланди.

Шунингдек, Венгрия адлия академияси ҳамда Венгрия Бош прокуратураси вакиллари мазкур ҳужжатни имзолаш маросимида кузатувчи сифатида иштирок этдилар.

Меморандум асосида Туркий давлатлар ташкилотига аъзо давлатларда судьялар ва прокурорлар, судьялик ҳамда прокурорлик лавозимларига номзодлар/ёрдамчиларга таълим берувчи Туркий судлов академиялари ва муассалардан иборат Туркий суд-ҳуқуқ таълими тармоғини тузиш ташаббусини илгари сурдилар. Мазкур тармоқ суд-ҳуқуқ соҳасидаги таълим борасида ўзаро ҳамкорликни ривожлантириш ва мувофиқлаштиришга кўмаклашиш мақсадида тузилди.

Меморандум имзоланган кундан бошлаб кучга киради ва ўн йил давомида амал қилади.

Мазкур меморандум Туркий давлатлар ташкилотига аъзо мамлакатлар раҳбарлари томонидан жорий йилнинг ноябрь ойида имзоланган Самарқанд декларациясини амалга ошириш чора-тадбирларининг давоми бўлиб хизмат қилади.