Ғарбий ва Марказий Осиё давлатларининг активларни қайтариш бўйича идоралараро тармоғининг (ARIN-WCA) Умумий йиллик йиғилиши ўтказилди

Покистоннинг Исломобод шаҳрида Ғарбий ва Марказий Осиё давлатларининг активларни қайтариш бўйича идоралараро ноформал тармоғига (ARIN-WCA) аъзо давлатларнинг Умумий йиллик йиғилиши бўлиб ўтди.

Тадбир Покистон раислигида ўтказилиб, Покистон Миллий ҳисоб бюроси (NAB) ва Федерал тергов агентлиги (FIA) ҳамда Бош прокуратура Академияси – ARIN-WCA тармоғининг доимий Котибияти вазифасини амалга ошириши доирасида БМТнинг Гиёҳвандлик ва жиноятчилик бўйича бошқармаси билан ҳамкорликда ташкиллаштирилди.

Умумий йиллик йиғилиш аралаш (онлайн ва анъанавий) шаклда ташкил қилиниб, унда 10 га яқин давлатдан 30 дан ортиқ вакил, хусусан, Озарбайжон, Монголия, Покистон, Қирғизистон, Қозоғистон, Тожикистон, Туркманистон, Украина, Ўзбекистон, Эрон давлатларининг прокуратура, ички ишлар, ташқи ишлар, адлия, молиявий разведка, коррупцияга қарши курашиш ва тергов идораларининг масъул ходимлари, CARIN ва ARINSA тармоқлари котибиятлари вакиллари ҳамда БМТнинг Гиёҳвандлик ва жиноятчилик бўйича бошқармаси экспертлари иштирок этишди.

Тадбирда ARIN-WCA тармоғига аъзо давлатларнинг жиноий активларни қайтариш соҳасида амалга оширган ишлари, тармоқни самарали бошқариш ва унинг доирасида ҳамкорликни кенгайтириш масалалари, амалиётдаги мавжуд муаммоларнинг муҳокамаси бўлиб ўтди. Шунингдек, йиғилиш иштирокчилари томонидан активларни қайтариш соҳасидаги ижобий тажриба ва амалиёт юзасидан тақдимотлар амалга оширилди.

Йиғилишни ўтказишдан асосий мақсад 2022 йилда мазкур тармоқ доирасида амалга оширилган ишларни сарҳисоб қилиш, шунингдек жиноий активларни қайтариш борасида идоралараро халқаро ҳамкорликни янада кенгайтириш ҳисобланади.

Умумий йиллик йиғилиш ишчан ва информатив тарзда ўтказилиб, иштирокчилар активларни қайтариш соҳасида фаол ҳамкорлик қилишга ҳамда ARIN-WCA тармоғини келгусида янада ривожлантиришга тайёр эканликларини билдиришди.