Одил судловни амалга оширишга масъул бўлган прокуратура органлари ходимлари учун тренинг ташкил этилди

Ҳуқуқни муҳофаза қилиш академияси томонидан Бош прокуратура билан биргаликда Европа Иттифоқининг Ўзбекистон учун 2021-2027 йилларга мўлжалланган кўп йиллик индикатив дастури доирасида ҳамда Европа Иттифоқининг Ўзбекистондаги делегацияси кўмагида жиноий одил судлов жараёнида коррупциявий хавф-хатарларини баҳолаш бўйича TAIEX INTPA лойиҳасини амалга ошириш бошланди.

Жиноий одил судлов соҳасида юзага келиши мумкин бўлган коррупция хавф-хатарларини аниқлаш ва баҳолаш масалалари бўйича тажриба алмашиш мақсадида Академияда “Жиноий одил судлов соҳасида коррупциявий хавф-хатарларни камайтириш” мавзусида уч кунлик тренинг ўтказилди.

Тренинг Европа Иттифоқининг коррупцияга қарши кураш масалалари бўйича эксперти, 2011-2016 йилларда Латвиянинг Коррупциянинг олдини олиш ва унга қарши курашиш бюроси (KNAB) раҳбари лавозимида фаолият юритган Ярослав Стрельченок томонидан ўтказилди.

Тренингда Бош прокуратура, Иқтисодий жиноятларга қарши курашиш департаменти, Мажбурий ижро бюроси ва Ҳуқуқни муҳофаза қилиш академиясининг тергов ва терговга қадар текширувни ўтказиш, тергов ва суриштирув фаолиятини назорат қилишга масъул бўлган, шунингдек ички хавфсизлик ходимлари иштирок этишди.

Тадбир якунида иштирокчилар томонидан коррупция хавф-хатарларини баҳолаш режаси, одил судловни амалга ошириш жараёнига жалб қилинган ходимларнинг коррупция эҳтимоли бўлган вазифалар ва функциялар рўйхати ҳамда коррупция хавфини аниқлаш бўйича сўровнома муҳокама қилиниб, уларнинг лойиҳалари ишлаб чиқилди.