Коррупцияга қарши курашиш агентлиги директорининг Академия тингловчилари билан учрашуви

Ўзбекистон Республикаси Ҳуқуқни муҳофаза қилиш академиясида амалиётга йўналтирилган таълим дастурлари асосида бугунги кунда талаб ва эҳтиёж катта бўлган йўналишлар, шу жумладан “Коррупцияга қарши курашиш” ҳамда “Инсон ҳуқуқларига оид халқаро ҳуқуқ” мутахассисликлари бўйича магистрлар тайёрланмоқда.

Назария ва амалиётнинг уйғунлигини таъминлаш, тингловчиларнинг билим ва кўникмаларини мустаҳкамлаш мақсадида етакчи экспертлар ва соҳа мутахассислари билан тизимли равишда учрашувлар ташкил этиб келинмоқда.

Академиядаги навбатдаги шундай учрашув 2023 йил 2 февраль куни Ўзбекистон Республикаси Коррупцияга қарши курашиш агентлиги директори А.Э.Бурханов билан бўлиб ўтди.

Учрашув давомида Агентлик директори иштирокчиларга коррупцияга оид хавф-хатарлар юқори бўлган соҳаларни аниқлаш, давлат ва хўжалик бошқаруви органларида коррупцияга қарши комплаенс-назоратни жорий қилиш, давлат хизматчиларининг даромад ва мол-мулкини декларация қилиш, шунингдек давлат харидлари соҳасида коррупцияга қарши назорат тизимларини жорий этиш борасидаги Агентлик фаолияти ҳақида маълумотлар берди.

Конструктив мулоқот шаклида давом этган мазкур учрашув жараёнида тингловчилар ва тадқиқотчилар ўзларини қизиқтирган саволларга жавоб олишди.

Тадбир соҳада малакали мутахассислар тайёрлаш ҳамда коррупцияга қарши таълимни кенгайтириш борасида Aкадемия ва Aгентлик ўртасидаги ўзаро ҳамкорликни кучайтириш йўлидаги навбатдаги қадам бўлди.