Янги методик қўлланма нашр этилди

Академиянинг ўқув-услубий бошқармаси томонидан ўқитишнинг инновацион услубларини жорий этиш ва Aкадемия профессор-ўқитувчиларининг педагогик маҳоратини ошириш мақсадида “Биргаликда ўқитиш (Сo-teaching) технологияси” номли методик қўлланма нашрга тайёрланиб,  чоп этилди.

Биргаликда ўқитиш (Сo-teaching) ривожланган мамлакатлар педагогик амалиётида кенг қўлланиладиган ва юқори самарали таълим шаклларидан бири бўлиб, ўқитувчиларнинг интерактив таълим фаолиятини интеграциялаш модели ҳисобланади.

Ушбу методик қўлланма муаллифлар жамоаси томонидан биргаликда ўқитишнинг замонавий ёндашувлари ва илғор хорижий тажрибаларини ўрганиш, шунингдек, Ўзбекистон Республикаси Ҳуқуқни муҳофаза қилиш академиясида ўтказилган тажриба-синов натижалари асосида ишлаб чиқилган.

Қўлланмада биргаликда ўқитиш технологиясининг мазмун-моҳияти, унинг бутун дунёда эътироф этилган 6 та модели кенг ёритилиб, улардан ўқув жараёнида фойдаланиш юзасидан профессор-ўқитувчилар ва педагоглар учун тавсиялар, биргаликда ўқитиш жараёнини режалаштириш, амалга ошириш, шунингдек, ўқитиш натижаларини баҳолаш бўйича аниқ намуналар келтирилган.