Иқтисодий жиноятларга қарши курашиш бўйича малака ошириш курси ўтказилмоқда

Ҳуқуқни муҳофаза қилиш академияси томонидан “Минтақавий мулоқот” ХННТ билан ҳамкорликда ҳуқуқни муҳофаза қилувчи органлар ходимларини жиноий даромадларни легаллаштириш ва терроризмни молиялаштиришга қарши курашиш бўйича мураббийликка тайёрлаш ва ўқитиш лойиҳаси амалга оширилмоқда.

Мазкур лойиҳа доирасида Академияда туман (шаҳар) прокуратуралари терговчилари ҳамда Иқтисодий жиноятларга қарши курашиш департаменти суриштирувчилари учун “Жиноий фаолиятдан олинган даромадларни легаллаштириш ҳолатлари бўйича молиявий тергов ўтказиш” мавзусида малака ошириш курси ташкил этилди.

Малака ошириш курси аралаш таълим шаклида ташкил этилиб, унда ишдан ажралмаган ҳолда масофавий таълим ва Академияда кундузги таълим шаклида ўқитиш назарда тутилган.

Ўқув курси дастуридан жиноий фаолиятдан олинган даромадларни легаллаштириш қарши курашишнинг халқаро ва миллий тизими, жиноий даромадларни легаллаштириш усуллари ва турлари, молиявий терговни ташкил этиш, шунингдек, криптоактивлар билан боғлиқ ҳуқуқбузарликларни аниқлаш бўйича назарий ва амалий машғулотлар ўрин олган.

Ўқув машғулотларига Академия профессор-ўқитувчилари билан бир қаторда “Минтақавий мулоқот” ХННТнинг жиноий даромадларни легаллаштириш ва терроризмни молиялаштириш соҳасидаги халқаро эксперти Ричард Джозеф Джойс жалб қилинган.