"Илмий тадқиқотлар: асосий услубий талаблар ва тамойиллар" мавзудаги семинар

Илмий салоҳиятни ривожлантириш мақсадида Ҳуқуқни муҳофаза қилиш академиясининг докторантлари ва мустақил изланувчилари учун етакчи хорижий ва миллий экспертлар иштирокида мунтазам равишда анъанавий, тематик "Фан соатлари" ташкил этилмоқда.

Тошкент шаҳридаги халқаро кимё университети “Халқаро иқтисодиёт” кафедраси доценти Раъно Мардонова иштирокида "Илмий тадқиқотлар: асосий услубий талаблар ва тамойиллар" мавзусида навбатдаги семинар ташкил этилди.

Тадбир интерфаол мунозара шаклида ўтказилиб, унда тадқиқотнинг амалий ва илмий муаммоларини шакллантириш, илмий тадқиқотнинг мақсади ва вазифаларини аниқлаш, тадқиқот предмети ва объектини тўғри белгилаш ҳамда илмий ғояларни амалга ошириш усуллари муҳокама қилинди.

Мазкур семинарлар илмий изланувчиларга ўз тадқиқотларини бойитиш учун қандай усул ва воситалардан фойдаланиш мумкинлиги, шу жумладан фанлараро, академик ва педагогик компетенцияларни кенгайтириш, илмий муаммоларни ҳал қилиш ва турли хил ахборот оқимларини таҳлил қилишнинг амалий усуллари тўғрисида янги билимларни олиш имкониятини яратади.