Швециянинг Лунд университети билан ҳамкорлик кенгаймоқда

Ўзбекистон Республикаси Ҳуқуқни муҳофаза қилиш академияси томонидан академик мобилликни кенгайтириш, прокурор-тергов кадрларни тайёрлаш соҳасида илғор тажрибани жорий этиш бўйича етакчи хорижий таълим ва илмий-тадқиқот муассасалари билан тизимли асосда ҳамкорлик амалга ошириб келинмоқда.

Лунд университети билан ҳамкорликда ўзаро тажриба алмашишга йўналтирилган Erasmus+ грантининг International Credit Mobility дастури ҳамда “Central Asian Law: Legal Cultures and Business environments in Central Asia” лойиҳаси амалга оширилмоқда.

Ўзаро ҳамкорлик доирасида юриспруденция ва ҳуқуқни қўллаш амалиётининг долзарб масалалари бўйича қўшма илмий тадқиқотларни ташкил этиш, педагогик тажриба алмашиш, стажировкалар ва таълим дастурларини ташкил этиш ишлари амалга оширилмоқда.

2022/2023 ўқув йилида Академия магистратурасининг икки нафар тингловчиси магистратуранинг иккинчи семестрини Лунд университетининг “Ҳуқуқ социологияси” департаментида давом эттирмоқдалар.

Тингловчилар тадқиқот ишлари доирасида 40 дан ортиқ мамлакат талаба ва тадқиқотчилари билан ўзаро фикр алмашган ҳолда инсон ҳуқуқлари ва бошқа соҳаларда Европа мамлакатларининг илғор тажрибаларини ўрганиш, инновацион тадқиқот усулларини ўзлаштириш имкониятига эга бўлмоқдалар.

Шунингдек, Академия Лунд университети томонидан мувофиқлаштирилаётган Европа Комиссиясининг “Central Asian Law: Legal Cultures and Business environments in Central Asia” лойиҳасига жалб этилган. Консорциум доирасида ташкил қилинган ушбу лойиҳада Цюрих университети, Прагадаги Карлов университети, Рига олий ҳуқуқ мактаби, Мармара Университети, Латвия университети ва бошқа машҳур таълим муассасалари иштирок этмоқда.

Мазкур лойиҳа доирасида Академиянинг докторанти томонидан Лунд университетида илмий-тадқиқот иши амалга оширилмоқда.

Ўзаро манфаатли ҳамкорлик Академия таълим ва тадқиқот салоҳиятини юксалтиришга салмоқли ҳисса қўшади.