Академия профессори, ю.ф.д. Рахимов Фахри Хайдаровичнинг 70 йиллик юбилейи муносабати билан илмий-амалий конференция ўтказилди

2023 йил 25 март куни ҳуқуқшунос олим, Ўзбекистон Республикаси прокуратурасининг Фахрий ходими, юридик фанлар доктори, профессор, жонкуяр ва фидойи устоз, Ўзбекистон Республикаси Ҳуқуқни муҳофаза қилиш академияси профессори Рахимов Фахри Хайдаровичнинг 70 йиллик юбилейи муносабати билан илмий-амалий конференция ўтказилди.

Прокуратура органларида узоқ йиллик меҳнат фаолияти давомида ўзини юқори малакали мутахассис, тажрибали ва масъулиятли ходим сифатида намоён этган, кўп йиллик амалий, илмий ва педагогик тажрибага эга бўлган устоз Ф.Х.Рахимовнинг илмий фаолияти ва амалий тажрибаларини ўрганиш мақсадида ташкил этилган мазкур тадбирда Ўзбекистон Республикаси Бош прокуратураси ва Ҳуқуқни муҳофаза қилиш академияси раҳбарияти ва ходимлари, Коррупцияга қарши курашиш агентлиги, Ички ишлар вазирлиги академияси, Ўзбекистон Республикаси Судьялар олий кенгаши ҳузуридаги Судьялар олий мактаби, Тошкент давлат юридик университети, Жамоат хавфсизлиги университети ва оммавий ахборот воситаларининг вакиллари иштирок  этдилар.

Тадбир иштирокчилари Ф.Х.Рахимовнинг илмий фаолияти давомида нашр этилган кўплаб дарсликлар, илмий-амалий қўлланмалар, илмий ва илмий-оммабоп мақолалари билан танишиш имконига эга бўлдилар.

Тадбирда сўзга чиққанлар юбилярнинг прокуратура ва ҳуқуқни муҳофаза қилиш органларида илмий-тадқиқот фаолиятини ривожлантиришдаги хизматларини алоҳида таъкидладилар.

Фахри Хайдарович кўп йиллик илмий фаолияти давомида суд-ҳуқуқ соҳасида кўплаб изланувчиларга илмий раҳбарлик қилган.

Бой илмий ва амалий тажрибага эга бўлган, тажрибали устознинг бугунги кунда Ўзбекистон Республикаси Ҳуқуқни муҳофаза қилиш академиясида прокурор-тергов ходимлари малакасини ошириш ва қайта тайёрлашнинг замонавий тизимини ташкил этишда, илмий ходимларни тайёрлашда ҳамда ўқув жараёнлари ва илмий муҳит ривожига муносиб ҳисса қўшиб келаётганлиги алоҳида эътирофга лойиқ.

Академия жамоаси Фахри Хайдаровични юбилей билан табриклаб, унга мустаҳкам соғлик, узоқ умр, кўтаринки кайфият, оилавий фаровонлик ва иш фаолиятида улкан муваффақиятлар тилайди!