Электив курсларни самарали ташкил этиш юзасидан семинар-тренинг ўтказилди

Ҳуқуқни муҳофаза қилиш академияси томонидан профессор-ўқитувчиларнинг педагогик маҳоратини ошириш, таълим жараёнига инновацион метод ва технологияларни жорий этиш борасида тизимли ишлар олиб борилмоқда.

2023 йил 23-27 март кунлари электив курсларни ишлаб чиқиш ва унга қўйиладиган талаблар ҳамда амалдаги электив курсларни самарали ташкил этиш бўйича Академия профессор-ўқитувчилари иштирокидаги навбатдаги семинар-тренинг ўтказилди.

Семинар-тренинг жараёнида профессор-ўқитувчиларнинг билим ва кўникмаларини ривожлантириш мақсадида малака ошириш жараёнини масофавий ва аралаш шакллар асосида диверсификациялаш механизмлари, масофавий ва аралаш малака ошириш жараёнини педагогик дизайн (Instructional design) моделлари асосида стратегик лойиҳалаштириш усуллари, масофавий ва аралаш курслар доирасида тьюторлик фаолияти юритишнинг ўзига хос хусусиятлари кўриб чиқилди.

Шунингдек, масофавий ва аралаш курслар ўқув режаларини мажбурий ва электив модуллар асосида шакллантириш технологиялари, электив курсларнинг таркибий қисми, дидактик таъминоти, янги ишлаб чиқилган электив курсларни электрон платформага жойлаштириш ва амалиётга жорий этиш масалалари атрофлича муҳокама қилинди.

Мазкур семинар-тренинг Академия профессор-ўқитувчиларининг электив курсларни ташкил этиш масалалари ва унда тьюторлик фаолиятини юритишга оид кўникмаларини ривожлантириш, педагогик маҳоратини оширишга хизмат қилди.