Диссертация ишларида учраётган камчиликлар ва уларни бартараф этиш бўйича маҳорат дарси бўлиб ўтди

Ўзбекистон Республикаси Ҳуқуқни муҳофаза қилиш академиясида анъанавий фан соати доирасида “Диссертация ишларида учраётган камчиликлар: муаммо ва унинг ечимлари” мавзусида маҳорат дарси ўтказилди.

Фан соати доирасида Академия бошлиғининг ўринбосари, ю.ф.д., профессор М.Мамасиддиқов томонидан тадқиқотчилар диссертация ишини ёзишда дуч келадиган долзарб муаммоли масалалар юзасидан таҳлилий маъруза қилинди.

Маърузада сўнгги пайтларда диссертация ишларида учраётган камчиликлар сифатида мавзунинг долзарблиги ва заруратини етарли даражада асосламаслик, диссертантлар томонидан тадқиқот вазифалари эътибордан четда қолиши, бу эса тадқиқотнинг вазифалари билан диссертация режаси, диссертацияда илгари сурилаётган илмий янгиликларнинг ўзаро номувофиқлигига сабаб бўлаётганлиги, тадқиқотнинг усуллари сифатида кўрсатилган ҳолатларнинг ишда қўлланилмаётганлиги, диссертация хулосаларининг, илмий янгиликларнинг ишончсизлиги ва асосланганлиги даражасининг жуда саёзлиги, дисертация авторефератининг рус ва ўзбек тилидаги таржималарида учраётган ўзаро номувофиқликлар, ишда фойдаланилган адабиётларни шакллантиришда ҳам Низом талабларига риоя қилмаслик каби ҳолатларга тўхталиб ўтилди.

Маърузачи томонидан аниқ мисоллар орқали юридик фанлар бўйича диссертацияларда учраётган камчиликлар таҳлил қилиниб, диссертантлар олдида юзага келаётган айрим муаммолар ва уларни ҳал этиш юзасидан таклиф ва тавсиялар берилди.

Тадбирда нафақат Академиянинг, балки Инсон ҳуқуқлари бўйича Ўзбекистон Республикаси Миллий маркази, Ўзбекистон Республикаси Судьялар олий кенгаши ҳузуридаги Судьялар олий мактаби, ИИВ Академияси ва Тошкент давлат юридик университети докторантлари ва мустақил изланувчилари ҳам иштирок этишди ҳамда илмий тадқиқотлари юзасидан қизиқтирган саволларига жавоб олдилар.