Диссертациялар илмий натижаларининг амалиётга жорий қилинишини баҳолаш бўйича услубий кўрсатмалар мавзусида маҳорат дарси бўлиб ўтди

Ўзбекистон Республикаси Ҳуқуқни муҳофаза қилиш академиясида анъанавий фан соати доирасида “Диссертациялар илмий натижаларининг амалиётга жорий қилинишини баҳолаш бўйича услубий кўрсатмалар” мавзусида маҳорат дарси ўтказилди.

Фан соати доирасида Ўзбекистон Республикаси Олий аттестация комиссияси раиси, и.ф.д., профессор А.Т.Юсупов томонидан диссертациялар илмий натижаларининг амалиётга жорий қилинишини баҳолаш юзасидан таҳлилий маъруза қилинди. Маъруза савол-жавоб тарзида давом эттирилиб, онлайн ва оффлайн иштирок этаётган тадқиқотчилар ўзларини қизиқтирган, улар олдида долзарб бўлиб турган 50 дан ортиқ саволларга керакли жавобларни олишди.

Жумладан, ҳозирги кунда долзарб бўлган: докторлик диссертацияси ва диссертация авторефератини расмийлаштириш тартиби;  чет элда мақола чиқариш тартиби; диссертация ишининг илмиий янгилиги ва амалиётга жорий қилиниши ва жорий қилинганлиги бўйича маълумотнома олиш тартиби; диссиртация ишининг анти-плагиат дастурида текшириш ҳамда тадқиқот ишига иқтибос келтириш тартиби; бир мавзуда бир неча тадқиқотчи тадқиқот иши олиб бориши мумкинми ёки мумкин эмаслиги тўғрисидаги саволларга мутахассис томонидан етарлича жавоб олдилар.

Тадбирда Академия билан бир қаторда Инсон ҳуқуқлари бўйича Ўзбекистон Республикаси Миллий маркази, Ўзбекистон Республикаси Судьялар олий кенгаши ҳузуридаги Судьялар олий мактаби, Жамоат хавфсизлиги университети, ИИВ Академияси, Тошкент давлат юридик университети ва Божхона институтининг 200 дан ортиқ докторантлари ва мустақил изланувчилари онлайн ва оффлайн тарзда иштирок этиб, илмий тадқиқотлари юзасидан ўзларини қизиқтирган саволларига жавоб олдилар.