Прокуратура терговчилари ва Иқтисодий жиноятларга қарши курашиш департаменти ходимлари учун малака ошириш курси бўлиб ўтмоқда

Ҳуқуқни муҳофаза қилиш Академиясида туман (шаҳар) прокуратуралари терговчилари ҳамда Иқтисодий жиноятларга қарши курашиш департаменти туман (шаҳар) бўлимларининг тезкор ходимлари учун “Жиноий фаолиятдан олинган даромадларни легаллаштиришга ва терроризмни молиялаштириш ҳолатлари бўйича молиявий тергов ўтказиш”  мавзусида малака ошириш курси бўлиб ўтмоқда. 

Малака ошириш курси аралаш таълим шаклида ташкил этилган ва ишдан ажралмаган ҳолда масофавий таълим ҳамда Академияда кундузги таълим шаклида ўқитишни назарда тутган.

Ўқув курси дастуридан жиноий фаолиятдан олинган даромадларни легаллаштиришга ва терроризмни молиялаштиришга қарши курашишнинг ҳалқаро ва миллий тизимини, ушбу жиноятларга қарши курашишни ташкил этиш, ноқонуний даромадларни аниқлаш бўйича молиявий тергов олиб бориш, хорижий давлатлар илғор тажрибаси, молиявий ҳужжатларни таҳлил қилиш, жиноий даромадларни легаллаштиришнинг усул ҳамда механизмлари, ҳуқуқни муҳофаза қилувчи органлар ўртасида идоравий ҳамкорликни ўрнатиш, ноқонуний даромадларни аниқлаш ҳамда мусодара қилинишини таъмилаш, молиявий тергов ўтказишда Иқтисодий жиноятларга қарши курашиш департаменти имкониятларидан самарали фойдаланиш масалалари бўйича назарий ва амалий машғулотлар ўрин олган. 

Ўқув машғулотларига халқаро эксперт Ричард Джойс ва Академия профессор-ўқитувчилари билан бир қаторда Департаментнинг тажрибали мутахассислари жалб қилинган.