Прокуратура органлари ходимлари учун ўқув курсларини бошлаш бўйича семинар бўлиб ўтди

Ўзбекистон Республикаси Ҳуқуқни муҳофаза қилиш Академиясида прокуратура органлари ходимлари учун Европа Кенгашининг Марказий Осиёда 2020-2023 йилларда қонун устуворлигини таъминлаш борасидаги “Марказий Осиёда юридик мутахассислар учун инсон ҳуқуқлари бўйича таълим (HELP)” дастури доирасида “Одам савдосига қарши курашиш” ҳамда “Хотин-қизларни тазйиқ ва зўравонликдан ҳимоя қилиш” ўқув курсларини бошлаш бўйича семинар бўлиб ўтди.

Семинарда Европа Кенгаши ҳамкорлик дастурлари бошқармасидан Марказий Осиёда HELP лойиҳаси координатори Кристина Хохлова,  Норвегиялик прокурор Рудольф Кристофферсен, HELP дастурининг сертификатланган мутахассиси, ҳуқуқшунос, халқаро эксперт Люси Хрда, Инсон ҳуқуқи бўйича Европа судининг котибияти ҳуқуқшуноси Василий Лукашевич иштирок этди.

Икки кун давомида ўтказилган тадбирда “Одам савдосига қарши курашиш” ва “Хотин-қизларни тазйиқ ва зўравонликдан ҳимоя қилиш” ўқув курсларида ўқиш истагида бўлган прокуратура органларининг 60 нафардан ортиқ ходимлари ҳамда Академиянинг магистратура босқичи тингловчилари қатнашди.

Семинар жараёнида HELP дастурининг методологияси тақдимоти ўтказилиб, халқаро экспертлар томонидан “Одам савдосига қарши курашиш” ҳамда “Хотин-қизларни тазйиқ ва зўравонликдан ҳимоя қилиш” HELP ўқув курсларининг тақдимоти, асосий халқаро стандартлар, Инсон ҳуқуқлари бўйича Европа судининг одам савдоси бўйича суд амалиёти, мазкур тоифадаги жиноятларни тергов қилишдаги муаммолар ва илғор тажрибалар, ўқув курсининг миллий версияси тақдимоти, курсларнинг амалий жиҳатлари ҳақида маълумотлар берилди.

Халқаро ҳамда миллий экспертлар мавзу доирасида дастурда рўйхатдан ўтган ходимларга дастурда ишлаш, топшириқлар ва тестларни бажариш, ўқиш муддатлари ҳақида кўрсатмалар бериб, тингловчиларга муваффақият тилашди.