“Ҳарбий психология назарияси ва амалиётнинг долзарб муаммолари” халқаро илмий анжуманида иштирок этилди

Ҳуқуқни муҳофаза қилиш академияси ходимлари Қуролли Кучлар академиясида бўлиб ўтган “Ҳарбий психология назарияси ва амалиётнинг долзарб муаммолари” мавзусидаги халқаро илмий анжуманда иштирок этди.

Анжуманда М.В.Ломоносов номидаги МДУ, Россия Федерацияси ИИВнинг В.Я.Кикоть номидаги Москва университети, Россия Федерацияси Мудофаа вазирлиги Ҳарбий университети, Қуролли Кучлар академиясининг илмий ходимлари,  профессорлар, психология фани олимлари ҳам қатнашдилар.

Тадбирни Қуролли Кучлар академияси бошлиғи Б.Шаякубов очиб, психологиянинг бошқа фанлар тизимидаги ўрни, психологларнинг асосий йўналишлари ва фаолиятига оид қарашларнинг шаклланиш тарихи, ҳарбий психология фанининг шаклланиши, уларнинг Ўзбекистон Республикаси ва хорижда касбий тайёргарлиги тўғрисида сўз юритди. Сўнгра ўзбек ва жаҳон олимларининг маърузалари тингланди.

Ҳуқуқни муҳофаза қилиш академиясининг Касбий психология ва бошқарув фаолияти кафедраси доценти И.Махмудов "Ҳарбий хизматчиларга психологик ёрдам кўрсатиш" мавзусида ўз маърузаси билан иштирок этиб, унда ҳарбий қисмларда асосий вазифа бўлган психологик фаолият ҳақида сўз юритди. Сўнгра кафедра катта ўқитувчиси Ж.Каримовнинг "Психологик маслаҳат касбий фаолиятни психологик қўллаб-қувватлаш хусусияти сифатида" мавзусида илмий ишлари секцияда тингланди ва психологик ёрдамни ривожлантириш муаммолари ҳамда йўллари кўриб чиқилди.

Анжуман якунида тадбир иштирокчиларига, шу жумладан кафедра доценти И.Маҳмудовга фахрий ёрлиқ топширилди.