Судларда ишларнинг кўрилишида қонунийликни таъминлаш масалаларига оид навбатдаги малака ошириш курси якунланди

Ҳуқуқни муҳофаза қилиш академиясида туман (шаҳар) прокурорларининг ва уларга тенглаштирилган прокурорларнинг  ёрдамчилари иштирокида “Судларда фуқаролик, иқтисодий ва оммавий-ҳуқуқий муносабатларга оид ишларнинг кўрилишида қонунийликни таъминлаш ҳамда прокурорнинг роли” мавзусида ташкиллаштирилган малака ошириш курси якунланди.

Мазкур малака ошириш курси аралаш таълим шаклида ташкил этилган бўлиб, масофавий таълим ва аудитория машғулотлари тарзида замонавий педагогик ва ахборот-коммуникация технологияларини қўллаган ҳолда ўтказилди.

Курс дастури прокуратура фаолиятининг умумий масалалари, шунингдек  фуқаролик, иқтисодий, маъмурий ва жиноят суд ишларини юритишда прокурор ваколатини таъминлаш масалаларини қамраб олган бўлиб, тингловчиларнинг мазкур йўналишларидаги назарий билим ва кўникмаларини мустаҳкамлашга қаратилган машғулотлардан иборат.

Тасдиқланган дастур асосида ўтказилган ўқитишнинг масофавий шаклида ҳар ўқув ҳафтасининг якуни бўйича ташкиллаштирилган синхрон ўқув машғулотлари давомида ҳафталик ўзлаштиришни мониторинг қилиб бориш билан бирга, амалдаги қонунчилик талабларини ҳамда мавзу доирасидаги саволларга тушунтириш берилиб борилди.

Малака ошириш курсининг якуний босқичида эса тингловчиларнинг масофадан ўзлаштирган билим ва кўникмалари бевосита аудитория машғулотлари жараёнида тренинг ҳамда ўқитишнинг интерфаол услубларидан фойдаланган ҳолда, муаммоли-вазиятли ҳолатларни таҳлил қилиш ва казуслар ечимини топиш воситасида мустаҳкамланиб, тингловчиларнинг курс дастурини ўзлаштириш даражаси баҳоланди.