Тергов фаолияти масалаларига оид Халқаро илмий-амалий конференцияда иштирок этилди

Ўзбекистон Республикаси Ҳуқуқни муҳофаза қилиш академияси тингловчилари Беларусь Республикаси Тергов қўмитаси томонидан “Тергов фаолияти: фан, таълим, амалиёт” мавзусида ташкил қилинган III Халқаро илмий-амалий конференцияда иштирок этишди.

Конференция жиноят ва жиноят процесси ҳуқуқининг ривожланиш тенденциялари, дастлабки терговни криминалистик таъминлаш, жиноят ишлари бўйича судга қадар жараёнда суд экспертизаси ва тезкор-қидирув фаолиятни такомиллаштириш масалаларини муҳокама қилиш мақсадида ташкил қилинди.

Конференцияда тергов фаолиятининг долзарб масалаларини муҳокама қилиш учун Ўзбекистондан ташқари Беларусь Республикаси, Озарбайжон, Россия ва Тожикистоннинг ҳуқуқни муҳофаза қилувчи органлари вакиллари, амалиётчилар ҳамда тегишли олий таълим муассасалари вакилларидан иборат етук олимлар, илмий ходимлар ва тадқиқотчилар қатнашишди.

Пленар йиғилиш ва илмий секциялардаги маъруза ва муҳокамаларда бугунги кунда тергов фаолиятининг актуал бўлган масалалари ўрин олиб, уларнинг чуқур таҳлили амалга оширилди. Шунингдек рақамли соҳада амалга оширилаётган жиноятларнинг олдини олиш ва самарали тергов қилиш бўйича халқаро тажриба кўриб чиқилди.

Тадбир доирасида шунингдек Академия тингловчиларининг Беларусь Республикаси Тергов қўмитасининг Малака ошириш ва қайта тайёрлаш институтига ишчи амалий ташрифи амалга оширилди. Ташриф давомида Академия вакиллари ушбу институт фаолияти, таркибий тузилиши, вазифалари, унда терговчиларни ўқитиш, хусусан уларни малакасини ошириш ва қайта тайёрлаш жараёни, махсус жиҳозланган ўқув хоналари ва адабиётлар, тергов билан боғлиқ замонавий технологиялар билан яқиндан танишиб, тергов ва криминалистика соҳасидаги халқаро илмий тажриба ҳамда янги ишланмалар билан ўзаро ўртоқлашишди.