Ўзбекистон Республикаси Ҳуқуқни муҳофаза қилиш академияси магистратурасига қабул эълон қилинади

Ўзбекистон Республикаси Ҳуқуқни муҳофаза қилиш академиясида 2023/2024 ўқув йили учун “Прокурорлик фаолияти”, “Коррупцияга қарши курашиш” ҳамда “Инсон ҳуқуқларига оид халқаро ҳуқуқ” мутахассисликлари учун таълимнинг кундузги, шунингдек “Прокурорлик фаолияти” мутахассислиги учун таълимнинг сиртқи шакли учун магистратурага қабул бошлангани маълум қилинади.

Магистратурага танлов “юриспруденция” таълим йўналиши бўйича таянч олий юридик маълумотга эга бўлган фуқаролар (ш.ж. прокуратура органлари ходимлари) орасида ўтказилади.

Шунингдек, бошқа таълим йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари танловда иштирок этиши мумкин.

Ўқиш таълимнинг кундузги шаклида бир йил, сиртқи шаклида эса бир ярим йилдан икки йилгача давом этади.

Академия магистратурасининг “Прокурорлик фаолияти”, “Коррупцияга қарши курашиш” ҳамда “Инсон ҳуқуқларига оид халқаро ҳуқуқ” йўналишлари бўйича кундузги таълим шаклида 2023/2024 ўқув йилига жами 45 та, жумладан, ҳар бир мутахассислик бўйича 15 тадан қабул квоталари тасдиқланган:

- ташқи номзодлар учун 10 та (1 та давлат гранти ва 9 та тўлов-контракт);

- ички номзодлар учун 5 та (давлат гранти).

Таълимнинг сиртқи шакли бўйича ташкил этиладиган “Прокурорлик фаолияти” мутахассислиги учун жами 25 та қабул квоталари жорий қилинди:

- ташқи номзодлар учун 10 та (тўлов-контракт);

- ички номзодлар учун 15 та (5 та давлат гранти ва 10 та тўлов-контракт).

Магистратурага ўқишга қабул қилинган прокуратура органлари ходимларининг эгаллаб турган лавозими ва ўртача ойлик иш ҳақи ўқиш даври мобайнида сақлаб қолинади.

Очиқ танлов бўйича давлат гранти асосида қабул қилинган тингловчиларга қонун ҳужжатларида белгиланган тартиб ва миқдорда ҳар ойлик стипендия тўланади.

Магистратуранинг ушбу мутахассисликлари бўйича танлов жорий йилнинг август ойида ўтказилади.

Номзодларнинг ҳужжатлари 10 июндан – 31 июлга қадар Олий таълим, фан ва Инновациялар вазирлиги ҳузуридаги Билим ва малакаларни баҳолаш агентлигининг “mydtm.uz” электрон платформаси (https://my.uzbmb.uz/) орқали қабул қилинади.

Ўзбекистон Республикаси Ҳуқуқни муҳофаза қилиш академияси магистратурасига қабул қилиш ва ўқитишни ташкил этиш тартиби тўғрисидаги Низом билан қуйидаги ҳавола орқали танишишингиз мумкин: http://lex.uz/uz/docs/6425532

Академия магистратурасига кириш имтиҳонлари билан боғлиқ янгиликлар Академиянинг расмий веб-сайти (www.proacademy.uz), ижтимоий тармоқлардаги расмий саҳифалари: 

www.facebook.com/ProsecutorAcademy, 

www.instagram.com/proacademyuz/,

http://www.twitter.com/ProAcademyUz,

https://t.me/ProsecutorAcademy ҳамда оммавий ахборот воситалари орқали танишиб боришингиз мумкин.

Шунингдек, Академия магистратурасига қабул билан боғлиқ маълумотларни 71-202-04-96 (ички: 1795 ва 1775) телефон рақами орқали ҳам билиб олишингиз мумкин.