Академия Кенгашининг навбатдаги йиғилиши ўтказилди

Ҳуқуқни муҳофаза қилиш академияси Кенгашининг навбатдаги мажлиси бўлиб ўтди.

Мажлисда Академиянинг 2023 йил биринчи ярми мобайнида ўқув-услубий, илмий-таҳлилий йўналишларда амалга оширган фаолияти танқидий таҳлил қилиниб, янги ўқув йилига тайёргарлик масалалари муҳокама қилинди. Хусусан, ўқув бинолари ва ётоқхонада қурилиш-таъмир ишларининг бориши, илғор педагогик ва ахборот-коммуникация технологияларини қўллаган ҳолда таълим жараёнларини ўқув-методик ва моддий-техник жиҳатдан таъминлаш масалалари кўриб чиқилди.

Шу билан бирга, бакалавриат ва магистратуранинг янги йўналишларини жорий этиш, қабул жараёнларини очиқ ва шаффоф тарзда ташкил этиш ва ўтказишга қаратилган ўқув-услубий ва илмий-амалий тадбирлар муҳокама қилинди.

Шунингдек, мажлис кун тартибидан Академияда ишлаб чиқилган ходимларнинг фаолияти самарадорлигини баҳолаш услубиётлари муҳокамаси, профессор-ўқитувчилар солоҳиятини юксалтириш ҳамда фаолият жараёнларини рақамлаштириш масалалари ўрин олди.

Академиянинг 2023 йилнинг иккинчи ярмига мўлжалланган иш режасида белгиланган вазифалар кўриб чиқилиб, тадбирларнинг муддатида, сифатли ва тўлиқ бажарилиши лозимлиги, бунда тегишли тармоқ раҳбарлари шахсан масъул эканлиги кўрсатиб ўтилди.

Мажлис кун тартибидаги барча масалалар бўйича тегишли қарорлар қабул қилинди.