Ҳуқуқни муҳофаза қилиш академияси магистратураси битирувчиларига дипломлар топширилди

2023 йил 11 август куни Ҳуқуқни муҳофаза қилиш академияси магистратурасини 2022/2023 ўқув йилида тамомлаган магистрларга “Ҳуқуқ магистри” дипломларини топшириш маросими бўлиб ўтди.

Тантанали тадбирда Бош прокуратура ходимлари, Академия раҳбарияти ва ходимлари, магистратура битирувчилари ва уларнинг ота-оналари иштирок этдилар.

Академия раҳбарияти магистратура битирувчиларини самимий табриклаб, уларнинг келгусидаги фаолиятида улкан зафарлар тиладилар.

Тадбирда сўзга чиқувчилар Академия ўқув дастурлари прокурор-тергов соҳасида иш олиб бориш, норма ижодкорлиги ва таҳлилий фаолиятида иштирок этиш, шунингдек, фаолиятни ташкил этишнинг инновацион шакл ва усуллари, бошқарув асосларини ўзлаштириш бўйича касбий билим ва кўникмаларни чуқурлаштиришга қаратилганини таъкидлаб ўтдилар. Ўқув машғулотлари ҳам мазмунан, ҳам илмий-методик жиҳатдан янгича ёндашувлар асосида, илғор педагогик ва ахборот технологияларидан, хорижий инновацион тажрибалардан фойдаланган ҳолда ташкил этилгани, ўқув жараёнида профессор-ўқитувчилар билан бир қаторда миллий ва хорижий экспертлар, Парламент, вазирликлар, идоралар, илмий, таълим муассасалари ва жамоат ташкилотлари вакиллари иштирок этгани натижасида битирувчиларнинг илмий-тадқиқот ишлари етук мутахассис олимлар томонидан юқори баҳолангани алоҳида қайд этилди.

Шундан сўнг, Академияни муваффақиятли тамомлаган 63 нафар ёшларга “Ҳуқуқ магистри” дипломи топширилди.

Тадбирда Академиянинг битирувчилари ва уларнинг ота-оналари сўзга чиқиб, ушбу таълим даргоҳида ёшлар учун таълим олиш ва илмий фаолият олиб бориш борасида яратилган шароит ва имкониятларни юқори баҳолаб, Бош прокуратура ҳамда Академия раҳбарияти, профессор-ўқитувчиларига чуқур миннатдорчилик изҳор қилдилар.