Тергов тармоқлари ходимлари учун ўқув дала машғулотлари ўтказилди

Жорий йилнинг 14 сентябрь куни ИИВ ўқув-дала марказида Бош прокуратура, Ҳуқуқни муҳофаза қилиш Академияси, ИИВ Академияси томонидан АҚШ Федерал тергов бюроси билан ҳамкорликда ташкил этилган “Портлашдан кейинги тергов ҳаракатлари” мавзусидаги ўқув-амалий курси доирасида портлашдан кейинги кўздан кечириш ва далилларга баҳо беришга оид ўқув дала машғулотлари ўтказилди.

Ушбу дала машғулотларида прокуратура органлари, Ички ишлар вазирлиги, Давлат хавфсизлик хизмати тергов тармоқлари ходимлари, шунингдек Ҳуқуқни муҳофаза қилиш Академияси ходимлари ва магистратуранинг “Тергов фаолияти” йўналиши тингловчилари иштирок этишди.

АҚШ Федерал тергов бюроси экспертлари томонидан 2 та автоулов иштирокида портлаш жараёни ташкил этилиб, тингловчилар портлаш жараёни, ундан кейинги далилларни топиш, уларни тўплаш, текшириш ҳамда баҳолаш тартиби билан танишишди ҳамда ушбу жиноятлар бўйича тергов тактикаси ва услубларини қўллаш кўникмаларига эга бўлишди.

Тергов соҳасида ходимлар касбий компетенцияларини ривожлантиришга қаратилган амалий ўқув машғулотларини ташкил этиш ҳамда бу жараёнга етакчи хорижий экспертларни жалб қилиш ишлари Академия томонидан тизимли давом эттириб борилади.