Инсон ҳуқуқларини таъминлаш масалаларига оид ўқув курси давом эттирилмоқда

“Қийноққа солишга қарши курашиш: халқаро амалиёт ва миллий тажриба” мавзусидаги ўқув курсининг навбатдаги ўқув машғулотлари Навоий вилоятида бўлиб ўтди. Машғулотларда Навоий вилоятининг прокуратура ва ички ишлар органлари ходимлари тингловчилар сифатида иштирок этдилар.

Мазкур ўқув курси Ўзбекистон Республикаси Президентининг 2023 йил 7 февралдаги қарори билан тасдиқланган Ўзбекистон Республикасида Инсон ҳуқуқлари соҳасидаги Миллий таълим дастурига асосан Инсон ҳуқуқлари бўйича Ўзбекистон Республикаси Миллий маркази ташаббуси билан Ўзбекистон Республикаси Бош прокуратураси ҳамда Ички ишлар вазирлиги ҳамкорлигида ташкил этилган.

Унда Ҳуқуқни муҳофаза қилиш академияси, Давлат ва ҳуқуқ институти, ИИВ Академияси ва Малака ошириш институти раҳбарияти, профессор-ўқитувчилари инсон ҳуқуқлари соҳасидаги халқаро стандартлар, асосий тамойиллар, қийноқ ҳамда муомала ва жазолашнинг қаттиқ, шафқатсиз, инсонийликка зид ёки қадр-қимматни камситувчи турларига қарши конвенциянинг мазмун-моҳияти, ушлаб туриш, қамоққа олишга оид халқаро стандартлар, маҳбуслар ҳуқуқларини таъминлаш кафолатлари, камситмаслик, айбсизлик презумпцияси, қамоққа олиш, хабар беришга оид халқаро стандартлар ва Ўзбекистон Республикаси жиноий-ҳуқуқий тизимида мазкур стандартларнинг қўлланилиши каби ўзларининг маърузалари билан иштирок этишди.

Мазкур курс доирасида Навоий вилоятидаги тингловчилар учун Ҳуқуқни муҳофаза қилиш академияси бошлиғининг ўринбосари, ю.ф.д., профессор М.Мамасиддиқов томонидан “Қийноққа солиш билан боғлиқ қилмишлар содир этилишининг олдини олишга оид қонунчиликнинг ривожланиши” мавзусида маъруза қилинди.

Ўқув курси тингловчиларда катта қизиқиш уйғотди, ўзлари учун керакли билим ва малакага эга бўлдилар.