“Замонавий тергов фаолиятида инсон ҳуқуқларини таъминлаш масалалари” мавзусида давра суҳбати бўлиб ўтди

2023 йил 27 сентябрь куни Ўзбекистон Республикаси Ҳуқуқни муҳофаза қилиш академиясида мамлакатимизда инсон ҳуқуқларини таъминлаш борасида амалга оширилаётган ислоҳотлар, уларнинг мазмун-моҳиятини чуқур ўрганиш, бу борада академия тингловчиларининг билимларини янада ошириш мақсадида “Замонавий тергов фаолиятида инсон ҳуқуқларини таъминлаш масалалари” мавзусида илмий-амалий давра суҳбати бўлиб ўтди.

Тадбирда Ўзбекистон Республикаси Бош прокуратураси, Ҳуқуқни муҳофаза қилиш академияси, Давлат хавфсизлик хизмати академияси, Ички ишлар вазирлиги Академияси, Тошкент давлат юридик университети ҳамда Божхона институтининг малакали профессор-ўқитувчилари ҳамда Ҳуқуқни муҳофаза қилиш академиясининг “Тергов фаолияти” йўналиши магистратура босқичи талабалари иштирок этишди.

Тадбирни Академия бошлиғи ўринбосари, ю.ф.д., проф. М.Мамасиддиқов очиб берди.

Давра суҳбатида сўзга чиққан маърузачилар инсон ҳуқуқ ва эркинликларининг жиноят-процессуал кафолатларини такомиллаштириш, прокуратура органлари тергов фаолиятида инсон ҳуқуқларини таъминлаш давлат хавфсизлик хизмати ўқув муассасаларида инсон ҳуқуқлари соҳасида таълим, божхона органларининг суриштирув фаолиятида инсон ҳуқуқларини таъминлаш, ишни судга қадар юритишда процесс иштирокчиларининг ҳуқуқларини таъминлаш ва бошқа шу каби долзарб масалалар доирасида мавзуларда тўхталиб ўтдилар.

Шунингдек давра суҳбати иштирокчилари томонидан дастлабки тергов ва суриштирув фаолиятида инсон ҳуқуқлари таъминлаш масалалари, бу борада жиноят процессига янги жорий этилган ва такомиллаштирилган институтлар, қонунчиликка киритилган ўзгартиш ва қўшимчалар, уларнинг инсон ҳуқуқларини таъминлаш борасида аҳамияти, мавжуд муаммолар ва уларнинг ечимлари борасида фикр юритилди.

Давра суҳбати қизғин ва конструктив руҳда ўтди, иштирокчилар ушбу масалалар бўйича ўзларининг тўплаган билим ва бой тажрибаларини ўртоқлашдилар, қизиқарли фикр-мулоҳазалари ва таклиф-тавсияларини баён этдилар.