Прокуратура органлари ходимлари орасида “Тилини асраган элини асрайди” танлови бўлиб ўтди

2023 йил 11-12 октябрь кунлари Ҳуқуқни муҳофаза қилиш академиясида прокуратура, Департамент ва Бюро органлари ходимлари ўртасида “Тилини асраган элини асрайди” мавзусидаги танловнинг республика босқичи бўлиб ўтди.

Танловнинг ҳудудий босқичларида прокуратура органларининг 100 дан ортиқ ходими қатнашиб, унда ғолибликни қўлга киритганлар якуний босқичда иштирок этдилар.

Ҳудудлардаги танлов комиссиялари ва якуний босқичдаги Ҳайъат таркибига филолог, ёзувчи, шоирлар, адабиётшунос олимлар, тизим фахрийлари ҳам киритилган.

Биргина тизимли-таҳлилий иш танлови бўйича биринчи босқичда 1-ўринни эгаллаган иштирокчилар якуний босқичда оғзаки суҳбатда иштирок этдилар. Таҳлилий ишни ёзишда давлат тили тўғрисидаги қонун ҳужжатларига риоя этилиши ҳолати ва ушбу соҳада жамоатчилик назоратининг самарали усуллари, давлат тилининг амал қилиши билан боғлиқ муаммоларни бартараф этиш йўллари ва чоралари, давлат тилининг нуфузи ва обрўсини янада ошириш бўйича таклиф ва мулоҳазаларга алоҳида эътибор қаратиш талаб этилди. Оғзаки суҳбат Ҳайъат томонидан иш мавзуси доирасида ўтказилиб, тизимли-таҳлилий иш танловининг 1, 2 ва 3-ўринлари ғолиблари, шунингдек, “энг зўр тизимли таҳлил”, “анъанавий вазият ва ноанъанавий ечим” номинациялари соҳиблари аниқланди.

Саводхонлик танловининг биринчи босқичида номзодларнинг ўзбек адабий тили меъёрлари ва лотин ёзувига асосланган ўзбек алифбоси доирасида тест саволларини ечиш натижалари бўйича ғолиблар аниқланди. Саводхонлик танловининг якуний босқичда иштирокчилар томонидан долзарб мавзуларда ва мумтоз адабиёт асарлари асосида иншо ёздилар ва 1, 2 ва 3-ўринлари ғолиблари, шунингдек, “энг чиройли ҳуснихат” номинацияси соҳиби аниқланди.

Шеърият танловининг ҳудудий босқичида ғолиб бўлган номзодлар якуний босқичда нафақат адабиёт ва шеъриятнинг мукаммал билимдони, балки муаллиф сифатида ҳам иштирок этиб, ўзлари танлаган шеърий матнни танлов ҳайъати аъзолари ҳузурида ўқиб эшиттирдилар.