Сочи шаҳрида “Молиявий хавфсизлик” бўйича III-халқаро олимпиада якунланди

Россиянинг Сочи шаҳрида бўлиб ўтган “Молиявий хавфсизлик” бўйича III-халқаро олимпиадада Ҳуқуқни муҳофаза қилиш академияси масъуллигида жиноий даромадларни легаллаштириш ва терроризмни молиялаштиришга қарши курашиш бўйича Халқаро тармоқ институти вакиллари иштирок этишди.

Олимпиаданинг финал босқичи 4 та йўналиш (молиявий хавфсизлик, ахборот хавфсизлиги, юриспруденция ва халқаро муносабатлар) бўйича ўтказилиб, унда 19 та давлатлардан жами 377 нафар талаба ва Россиядан 109 нафар мактаб ўқувчилари иштирок этишди.

Талабаларимиздан 5 нафари “Молиявий хавфсизлик”, “Халқаро муносабаталар”, “Ахборот хавфсизлиги” йўналишларида I ва II даражали дипломларни қўлга киритганлиги Ўзбекистон Республикаси терма жамоасининг муваффақиятли иштирокини таъминлади.

Бундан ташқари, талабаларимиз олимпиада дастури доирасида ўтказилган тренинг, мастер-классларда фаол иштирок этишиб, 4 нафари “энг яхши тўғри жавоб”, “энг фаол иштирокчи”, “энг кўп тўғри жавоблар” номинацияларида ғолибликни қўлга киритишди ва қимматбаҳо совғалар билан тақдирланишди.

Хусусан, Ҳуқуқни муҳофаза қилиш академияси талабаси З.Абдуллаева “Киберхавфсизлик: касбий фаолият хавфи” мавзусида ўтказилган тренингда  “энг фаол иштирокчи” номинациясида ғолиб деб топилиб, қимматбаҳо совға (планшет) билан тақдирланди.

Олимпиада доирасида ўтказилган фижитал футбол мусобақасида Ж.Размуҳамедов (ТАТУ) ғолиб бўлиб, 2024 йилнинг 21 февраль – 3 март кунлари Россиянинг Қозон шаҳрида ўтказиладиган мусобақада иштирок этиш йўлланмасини қўлга киритди.

Олимпиадада иштирокчилар учун 60 дан ортиқ таълим, спорт ва маданий тадбирлар, хусусан, 15 та практикум, 40 га яқин мастер-класс, тренинг ва муҳокамалар ташкил этилиб, ушбу жараёнга 300 нафарга яқин экспертлар жалб этилди.

Давлатлар миқёсида (19 давлат) Олимпиада тадбирлари натижасига кўра, Ўзбекистон вакиллари жамоавий ҳисобда фахрли 2-ўринни эгаллашди.