“Рақамли криминалистика: муаммолар ва истиқболлар” мавзусидаги миллий семинар-тренинг бошланди

Жорий йилнинг 23 октябрь куни Ҳуқуқни муҳофаза қилиш академиясида ЕХҲТнинг Ўзбекистондаги лойиҳалари координатори билан ҳамкорликда “Рақамли криминалистика: муаммолар ва истиқболлар” мавзусида семинар-тренинг бошланди.

Семинар-тренингни Ҳуқуқни муҳофаза қилиш академияси бошлиғининг биринчи ўринбосари Е.В.Коленко ва ЕХҲТнинг Ўзбекистондаги лойиҳалари координаторининг миллий маслаҳатчиси Л.Мақсудова кириш сўзи билан очиб беришди.

Семинар-тренингдан кўзланган мақсад Ўзбекистон Республикаси ҳуқуқни муҳофаза қилувчи органлари терговчиларининг ахборот технологияларидан фойдаланган ҳолда содир этилган жиноятларни рақамли далиллар ва замонавий рақамли криминалистика воситаларидан фойдаланган ҳолда тергов қилиш борасида салоҳиятини оширишдан иборат.

Ушбу семинар Молдова, Португалия, Россия Федерацияси, Жанубий Кореянлик хорижий экспертлар иштирокида ўтказилмоқда.

Беш кунлик семинар-тренинг дастури очиқ манбалар (OSINT)га асосланган тергов; вояга етмаганларни сўроқ қилишни жорий этишнинг криминалистик тактикаси асослари ва OCSEA терговида фойдаланиладиган технологиялар; интернет тармоғининг яширин сегменти “Даркнет”га кириш; жиноий мақсадларда фойдаланиладиган криптовалюта операциялари бўйича маълумотларни йиғиш ва таҳлил қилиш тартиби ва бошқа долзарб масалаларни ўз ичига олган.

Иштирокчилар, шунингдек, интернет орқали содир этиладиган иқтисодий жиноятларнинг замонавий усуллари, шунингдек, рақамли далилларни, компьютерлар ва мобил қурилмаларни текширишнинг илғор усулларини ўрганиш, маълумотлар базаларидан рақамли далилларни текшириш ва йиғиш хусусиятлари ва мобил қурилмалар криминалистикаси билан танишиш имкониятига эга бўладилар.

Семинар-тренинг жорий йил 27 октябрь куни якунланади.