Судларда жиноят ишлари кўрилишида ва суд қарорларининг ижросида қонунийликни таъминлаш масалаларига бағишланган малака ошириш курси

Академияда туман (шаҳар) прокурорлари ва уларга тенглаштирилган прокурорларнинг  ёрдамчилари учун “Судларда жиноят ишлари кўрилишида ва суд қарорларининг ижросида қонунийликни таъминлаш масалалари” мавзусида малака ошириш курси ўтказилди.

Мазкур малака ошириш курси аралаш таълим шаклида ташкил этилган бўлиб, масофавий таълим ва аудитория машғулотлари тарзида замонавий педагогик ва ахборот-коммуникация технологияларини қўллаган ҳолда ташкил этилди.

Ўқув дастури Академия профессор-ўқитувчилари томонидан прокурорлик амалиётидаги долзарб масалалардан келиб чиққан ҳолда мавзу доирасидаги тақдимот материаллари, амалий мисоллар, тест ва казуслар ҳамда мультимедиа ўқув материаллари асосида шакллантирилган.

Ўқув машғулотлари ўқув курси дастури доирасида прокуратура фаолиятининг ташкилий-ҳуқуқий асослари ҳамда судларда жиноят ишлари кўрилишида прокурор ваколатини таъминлаш ва суд қарорларини ижросида қонунийликни таъминлаш масалаларига бағишланган.

Ўқув машғулотлари давомида мамлакатимизда амалга оширилаётган суд-ҳуқуқ ислоҳотлари шароитида амалдаги қонунчиликка киритилаётган янгиликлар, суд қарорларини қайта кўриш институти такомиллаштирилишининг зарурати,  суд қарорларининг ижроси билан боғлиқ амалиётда мавжуд бўлган муаммолар ва уларнинг ечимига оид масалалар ёритилди.

Тингловчиларнинг малака ошириш курси давомида ўзлаштирган билимлари улар томонидан мустақил равишда бажарилган лаборатория ишларининг муҳокамаси жараёнида синовдан ўтказилди.

Имтиҳон якунлари бўйича тингловчиларга сертификатлар топширилди.