“Рақамли криминалистика: муаммолар ва истиқболлар” мавзусидаги миллий семинар-тренинг якунланди

Ҳуқуқни муҳофаза қилиш академиясида ЕХҲТнинг Ўзбекистондаги лойиҳалари координатори билан ҳамкорликда “Рақамли криминалистика: муаммолар ва истиқболлар” мавзусида миллий семинар-тренинг ўтказилди.

Семинар-тренинг 22-27 октябрь кунлари Молдова, Португалия, Россия Федерацияси, Корея Республикасидан соҳанинг етакчи хорижий экспертлари иштирокида ўтказилди.

Тадбир доирасида Молдова Республикасининг Кибержиноятларга қарши курашиш маркази эксперти А.Дегтярев интернет тармоғи орқали болаларни жинсий эксплуатация қилиш соҳасидаги жиноятларни тергов қилишда рақамли далилларни аниқлаш ва тўплаш бўйича амалий машғулотлар олиб борди.

Португалиялик эксперт – Интерполнинг жиноий разведка бўйича мутахассиси Руи Лопес Виейра интернет орқали болаларнинг жинсий эксплуатация қилиш соҳасидаги жиноятларга қарши курашишда халқаро ҳамкорлик қоидалари бўйича машғулотлар ўтказди.  

Россия Федерацияси Тергов қўмитасининг Эксперт-криминалистика бош бошқармаси бошлиғининг ўринбосари, адлия генерал-майори И.А.Стрельцов ва биринчи (электрон оммавий ахборот воситаларини текшириш) бўлим  бошлиғи, полковник Т.Ю.Салихов Россия Федерациясининг Тергов қўмитаси фаолиятида рақамли криминалистика имкониятлари борасида, шунингдек жиноий мақсадларда фойдаланиладиган криптовалюта операциялари бўйича маълумотларни йиғиш ва таҳлил қилиш тартиби тўғрисида ўқув машғулотлари олиб боришди.

Семинарнинг охирги икки кунида Корея Республикаси Олий прокуратураси ҳузуридаги Рақамли криминалистика миллий маркази экспертлари Парк Ёнжаи ва Йи Чангван Кореянинг етакчи компанияларининг HANCOM GMD ва Final Mobile дастурлари ёрдамида мобил қурилмалардан маълумотларни чиқариб олиш ва таҳлил қилиш бўйича амалий машғулотлар ўтказишди.

Тадбир сўнгида семинар-тренингда иштирок этган ҳуқуқни муҳофаза қилувчи орган ходимларига ЕХҲТнинг Ўзбекистондаги лойиҳалар координатори в.в.б. С.Сизов томонидан сертификатлар топширилди.